Barazimi në mesditë të shtunën mes Realit dhe Atletikos në derbin e Madridit duhet ta kishte frymëzuar Barcelonën për të fituar medoemos në sfidën e saj ndaj Malagës.
Krejt ndryshe ka ndodhur, pasi katalanasit kanë humbur papritur 2-0 në “Estadio La Rosaleda”, duke u dhënë një goditje të fortë synimeve për titull.
Ndaj Malagës është gabuar fund e krye; veç humbjes, është dhe një karton i kuq për Neymar-in. Diferenca me Realin kryesues mbetet kështu tre pikë, e pos kësaj madrilenët kanë dhe një ndeshje ende të paluajtur.
Humbja nuk ndihmon as në moralin e skuadrës para përballjes në Torino me Juventusin për Champions League-n.
Asgjë për t’u shënuar në takimet e javës së 32-të të Premier League-s angleze. Çelsi ka fituar 1-3 në fushën e Bornmëthit dhe ka bërë një hap tjetër përpara drejt fitimit të kampionatit.
Më herët kemi fitoret e skuadrave të tjera të vendeve të para. Totenhemi mposhti 4-0 Uotfordin, Mançester Siti e mbylli 3-1 përballjen me Hall Sitin, e në të njëjtën mënyrë Liverpuli u kthye me tre pikë nga transferta ndaj Stouk Sitit pas fitores 1-2.
Në Serinë A, kalendari e favorizon fort Juventusin për një tjetër trofe të kampionatit. Fitorja 2-0 ndaj Kievos as përbën lajm, e as pritej që të ndodhte ndryshe.
Argjentinasi Higuain ishte shënuesi i të dy golave; Juventusi kryeson me 77 pikë përkundër 68 pikëve të Romës, që luan sot në fushën e Bolonjës.
Në dy takime të tjera të javës së 31-të të kampionatit italian, të luajtura po dje, rezultati qe i njëjtë, 1-1. Kështu u mbyll si sfida Empoli – Peskara, ashtu dhe ajo mes Atalantës dhe Sasuolos. /tesheshi.com/
