Futbolli i klubeve në Europë ka rinisur në mënyrë të përshpejtuar pas pushimeve të detyruara për shkak të kualifikueseve për Botërorin.
Takimet e fundjavës ndiqen shpejt nga të tjera sfida të këtyre dy apo tre ditëve në vazhdim. Për të veçuar dy gjysmëfinalet e dyta të Kupës së Italisë, që risjellin dy përplasje gjigande.
Rivalët e kryeqytetit italian ndeshen sonte në 20:45 në përballjen e dytë gjysmëfinale, me të parën të fituar 2-0 nga Lacio më 1 mars.
Roma, që mban dhe vendin e dytë në klasifikimin e Serisë A, do të kërkojë me patjetër fitoren dhe vajtjen në finale. Në çdo rast, si në çdo sfidë mes Romës dhe Lacios, nuk do të mungojë beteja sportive.
Një mbrëmje më tutje, të mërkurën, do të përsëritet supersfida e së dielës së shkuar: Napoli – Juventus. Nëse në atë ndeshje ekipet u ndanë në barazim, për Napolin nuk ka alternativë tjetër veç fitores këtë herë, duke patur parasysh se torinezët i kanë mundur napolitanët 3-1 në takimin e parë.
Po këtë të martë dhe të mërkurë do të luhen dhjetë takimet e javës së 31-të të kampionatit anglez, ku kryendeshja është ajo e mbrëmjes së ditës së nesërme, mes Çelsit dhe Mançester Sitit.
Në të njëjtën ditë, në një tjetër kampionat, në atë të Spanjës, Barcelona – Sevilja veçohet mes ndeshjeve të javës së 30-të.
Bundesliga gjermane do të jetë mes kampionateve që nuk do të ketë pushim, me nëntë sfidat e javës së 27-të. Nëse kërkon të përmendësh një takim interesant, është ai i kësaj mbrëmjeje, Borusia e Dortmundit – Hamburg. /tesheshi.com/
