Federata Shqiptare e Futbollit, si dhe Liga Profesioniste, vendosën ta ndërpresin bojkotin e tyre në shenjë presioni ndaj qeverisë lidhur me katër kërkesa, duke bërë që këtë të dielë të nisin ndeshjet e kupës dhe më pas kampionatet.
Kreu i FSHF-së, Armando Duka, tha se “vendimi përfundimtar ishte për disa arsye”.
“Për arsye të domosdoshmërisë të spektatorëve që duan të shohim futboll, për arsye të lojtarëve. Një ndërprerë kaq e gjatë i bën dëm atyre dhe trajnerëve”, theksoi ai.
Sipas tij, edhe negociatat me qeverinë po ecin mirë.
“Bojkoti e ka realizuar qëllimin e tij. Jemi në rrugë të mbarë. Kam pasur takime të vazhdueshme me qeverinë, jemi në rrugën e mbarë për t’i zgjidhur gjërat. Ka dakordësi për kërkesat. Kryesorja është të shohim futboll. Ky ishte vendimi më i drejtë për futbollin në këtë moment.
Ne nuk bëjmë presion, kërkojmë bashkëpunim për të realizuar objektivat. Të gjithë jemi për një qëllim”, theksoi Duka.
Pasoi reagimi i kryeminsitrit Rama, që tha se dhe naftëtarët e Ballshit duhet të veprojnë ngjashëm.
“E përshëndes fundin e bojkotit absurd të Ligës Profesioniste të Futbollit dhe rifillimin e kampionatit të dielën! Tani po,gati të flasim me Federatën Shqiptare të Futbollit për të zgjidhur me mirëbesim e mirëkuptim hallet e Ligës! Uroj që naftëtarët të marrin shembull. Unë jam gati”, shkroi Rama. /tesheshi.com/
