Loja më popullore në botë po njeh një fenomen të ri prej pak vitesh, atë të largimit të futbollistëve e trajnerëve nga Europa drejt Kinës së largët. E nëse më herët, jo shumë kohë më parë, transferimet për në Kinë ishin më së shumti të lojtarëve në fazat e fundit të karrierës, tani paratë e shumta po tundojnë dhe futbollistë që janë në kulmin e tyre.
Kërcënim e pati quajtur Antonio Conte këtë fenomen javën e shkuar; sot Çelsi pohon se pikërisht një futbollist i tij, braziliani Oscar, do të kalojë në janar te një klub kinez, Shanghai SIPG.
Shuma e derdhur për mesfushorin e Brazilit mësohet të jetë 60 milionë euro, teksa ai do t’u bashkohet bashkëpatriotëve Hulk dhe Helkenson te klubi kinez, përpos ish-trajnerit të Çelsit, Andre Villas-Boas.
Oscar u afrua te Çelsi në vitin 2012, duke shënuar 38 gola në 203 aktivizime për skuadrën londineze. Skemat e reja të italianit Conte ia kufizuan mundësinë e aktivizimit brazilianit, që vetëm 25 vjeç do të transferohet në Kinë.
“25-vjeçari do t’i bashkohet ekipit të Superligës kineze në fillim të transferimeve të janarit. Ai ka qenë një lojtar i Çelsit për katër vite e gjysmë… Oscar është vlerësuar lart nga tifozët, lojtarët dhe personeli, gjatë kohës së tij si një lojtar i Çelsit… Ne e falënderojmë Oscar-in për shërbimin e tij të mrekullueshëm dhe i urojmë shumë fat në të ardhmen,” lexohet në njoftimin e klubit të Çelsit. /tesheshi.com/
