Si të mos mjaftonte bllokada e shteteve të Gjirit ndaj Katarit pas një krize të shpërthyer ditë më parë, është përfaqësuesja e këtij vendi që mund ta pësojë nga organizmi qeverisës i futbollit botëror.
Lojtarët e kombëtares së Katarit kanë përdorur gjatë nxehjes përpara takimit me Korenë e Jugut bluza të bardha ku ka qenë i stampuar portreti i emirit; një shenjë mbështetjeje për të parin e vendit.
E njëjta bluzë do të valëvitej në fushë nga shënuesi i golit të parë për Katarin gjatë kësaj ndeshjeje të vlefshme për eliminatoret e Kupës së Botës.
Pas takimit të fituar 3-2, trajneri uruguajan i Katarit deklaroi se nuk shihte diçka në këto veprime që mund të meritonte dënim.
“Ajo (bluza me portretin e emirit) nuk thotë gjë kundër askujt,” do të deklaronte Jorge Fossati.
FIFA ka një qëndrim të ngurtë në këtë pikëpamje, pasi nuk lejon mesazhe politike, fetare apo tregtare në veshjet e përdorura nga lojtarët. Një qëndrim që mund të nxisë marrjen e vendimeve disiplinore ndaj përfaqësueses së Katarit. /tesheshi.com/
