Eliminimi i Brazilit në ndeshjet në grupe të Kupës së Amerikës, diçka që nuk ngjiste prej gati 30 vitesh, është sinjali më i fundit se futbolli brazilian gjendet tashmë në mes të një vorbulle krize.
Një krizë e nisur që me atë humbje katastrofike ndaj Gjermanisë dy vite më parë. Humbja historike 7-1 në gjysmëfinalen e Botërorit të 2014-tës nuk është lënë pas akoma, e pasqyruar në rezultatet vijimësisht jopozitive.
Për të ardhur te shkarkimi i trajnerit Dunga pas humbjes të së hënës në Kupën e Amerikës ndaj Perusë. Dunga u emërua për herë të dytë si trajneri i kombëtares braziliane me detyrën për ta shndërruar sërish në fitues ekipin tradicionalisht më të mirë në botë.
Eliminimi në Kupën e Amerikës, e një pozicion aspak i mirë në kualifikueset për në Botërorin e 2018-tës, ku Brazili renditet në vend të gjashtë, kanë sjellë shkarkimin e tij.
Ndërkaq, një prej yjeve të futbollit brazilian në vitet ’70 të shekullit të shkuar, Rivellino, shpreson shumë
që Brazili të mos kualifikohet për në Botërorin e ardhshëm, për të sjellë një shkundje të mirë e për ta bërë të detyrueshëm ndryshimin e nevojshëm.
“Shpartallimi i Brazilit nga Gjermania nuk mjaftoi për ta bërë të detyrueshëm ndryshimin,” ka deklaruar Rivellino.
“Shpresoj që Brazili të mos kualifikohet për në Rusia 2018. Mendoj se kjo duhet të ngjasë për të mirën e futbollit brazilian. Vetëm një tragjedi do t’i detyronte udhëheqësit të hapnin sytë.”
Në rast se do të ndodhte kjo, do të ishte hera e parë që Brazili nuk do të kualifikohej për në një Kupë Bote. Rivellino mendon se Brazili nuk e meriton të luajë në të në 2018-tën. /tesheshi.com/
