Në të kundërt të një lloj “njollosjeje” që po shkaktojnë në futboll, shifrat e larta të blerjes së lojtarëve, në sytë e publikut vjen edhe një veprim bujar, që përpiqet t’u kthejë vëmendjen të gjithëve se sporti ka edhe një sens humanizmi në vetvete.
Mesfushori Juan Mata që luan me Manchester United, fton të gjithë futbollistët, pa dallim emri apo shifre ekonomike, që të japin 1 përqind të pagës së tyre, për bamirësi.
Spanjolli e ka shprehur këtë inisiativë në një intervistë dhënë për “Guardian”, ku evidenton faktin se për këtë administruar këtë nismë, po krijohet një organizatë “Goal Common” me fonde të përbashkëta.
“Kërkoj edhe 10 lojtarë të tjerë, që si fillim të bëhemi 11 të tillë. Nuk është e thënë të jenë top player, mund të kontribojë kushdo që e ndjen. Më pas ftoj këdo që dëshiron, edhe trajnerë, federata të ndryshme. Dua që sporti t’u hapë sytë njerëzve, të shohin si krijohen projekte për fëmijë, apo njerëz në nevojë. Pra futbolli të shihet edhe nga këndvështrimi human”- është shprehur mes të tjerash Juan Mata.
Ndërkohë nisma e lojtarit të Manchesterit ka gjetur “partnerin” e parë. Mbrojtësi gjerman i Bajernit, Matts Humels, ka shkruar në rrjetet sociale se është gati të vërë në dispozicion të projekteve humanitare 1 përqind të pagës së tij. /tesheshi.com/
