Nga Mensur Krasniqi
Akuzave të partisë maqedonase në pushtet, VMRO-së, se “Koalicioni për Ndryshim dhe Drejtësi”, po punojnë për federalizimin e shtetit, të shtunën, në kuadër të fushatës parazgjedhore në takim me qytetarët e Strumicës i është përgjigjur bartësi i listës së deputetëve në njësinë e 4 zgjedhore nga ky koalicion, Sllobodan Bogoevski.
Sipas tij, është pikërisht VMRO-DPMNE në krye me Nikolla Gruevskin dhe ish kreun e kësaj partie, Ljupço Georgievskin ajo e cila ka manipuluar me popullin, dhe se askush nuk mund ta federalizojë Maqedoninë.
“Më keqja është se manipulojnë me kategoritë më të ndjeshme dhe sigurinë e Maqedonisë. Askush nuk mund të federalizojë Maqedoninë, dhe as që ka tentuar dikush ta bëj atë. Tezat e federalizimit të parët i kanë mbrojtur Ljupço Georgievski dhe Nikolla Gruevski”, deklaroi Bogoevski.
Nga ana tjetër, sipas analistit politik, Hadi Osmani ideja për federalizim të shtetit nuk është asgjë tjetër përveçse manipulim klasik ndërmjet maqedonasve dhe ëndërr e parealizueshme e një partie shqiptare e cila në pamundësi që të thirret në Shqipërinë e Madhe, këtë e ka zëvendësuar me tezën e federalizimit.
“Maqedonasit federalizimin e përdorin vetëm për betejën e tyre parazgjedhore dhe e kanë si akuzë ndaj njëra tjetrës. Ndërsa si koncept federalizimi nuk ju konvenon shqiptarëve në Maqedoni pasi dëmton shumë qytete të përziera etnikisht si Kumanovën, Strugën, Ohrin etj. Por kjo është një ëndër e një partie të sapoformuar shqiptare(LR-PDSH) që nga pamundësia për të përmendur Shqipërinë e Madhe e zëvendësojnë me tezën e federalizimit të Maqedonisë. Shenjë më e mirë se federalizimi i shtetit është i dëmshëm për shqiptarët, e kemi gjendjen aktuale politike, ku dy parti s’mund të bëhen bashkë për ti mbrojtur interesat e shqiptarëve nga partia tjetër shqiptare, e lëre të udhëheqin një shtet të federalizuar”, deklaroi për portalin tesheshi, analisti politik, Hadi Osmani.
Ndryshe nga blloku politik shqiptarë në Maqedoni, e vetmja parti politike që promovon federalizimin e shtetit është ajo e Lëvizjes për Reforma në PDSH në krye me Ziadin Selën.
Ndërsa teza tjetër është ajo e Ridefinimit. Këtë e ka promovuar Lëvizja BESA që në fillimet e saj dhe tashme e ka kredo të veten politike. Ridefinimi nuk është gjë tjetër vetëm se një kontratë e re për ripozicionimin e faktorit shqiptar si kolonë e mbajtjes në këmbë të shtetit maqedonas, si në rrafshin politik ashtu dhe në atë social e shoqëor. Ridefinimi tënton ta riaktualizojë Marrëveshjen e Ohrit në një dritë të re zhvillimesh, duke qenë se në terma realë ajo po rezulton e dështuar për shkak e mosaplikimit në praktikë. /tesheshi.com/
