Vetëm 6 parti i kanë deklaruar shpenzimet për fushatës elektorale, e cila ka nisur 20 ditë më parë. Në mesin e tyre nga partitë e mëdha janë vetëm LDK dhe NISMA, kurse PDK, Vetëvendosje dhe AAK nuk i kanë treguar ende shifrat e shpenzuara.
Kjo është bërë e ditur në një konferencë për media nga koalicioni i organizatave jo qeveritare, Demokracia në Veprim.
Çeku Ondrej Cakl, i “Transparency Internacional”, tha se ata i kanë dërguar të gjitha partive pyetësorët rreth shpenzimeve të tyre për këtë fushatë zgjedhore, por vetëm gjashtë nga to i kanë plotësuar.
“Janë 6 nga 20 subjekte të përzgjedhura që i janë përgjigjur pozitivisht thirrjes për të ofruar të dhëna mbi shpenzimet. Gjashtë parti të cilat janë shembuj të transparebncës sa i përket financimit, janë Lëvizja për bashkim, Nisma për Kosovën, LDK. Partia Fjala ,Partia Socialdemokrate dhe Lëvizja për Gorën. Dua t’iu bëj thirrje partive tjera politike, që t’i përgjigjen pyetësorit që t’i marrim parasysh të dhënat e tyre”.
“LDK një parti e madhe që ka deklaruar që ka buxhet financiar 450 deri në 500 mijë euro, e cila i harxhon në këto zgjedhje. Ka kompani të kontraktuar për ti bërë ‘piarin’.
Shumicën e aktiviteteve të saj i shohim në rrjetet sociale. Ka treguar transparencë të plotë dhe në atë se ka një shtab zgjedhor dhe raportin financiar do ta bëjë publik pas përfundimit të fushatës ashtu siç kërkon ligji. Ata kanë qenë të hapur. Po kështu edhe partia Nisma, e cila ka treguar se ka 50 mijë euro mjete financiare për shpenzimet gjatë kësaj fushate”, tha Cakl.
Kurse Florent Spahija nga DnV tha se deri më tani fushata është karakterizuar me tubime të vogla, prani të nëpunësve civil dhe veturave zyrtare, dhe pjesëmarrje të fëmijëve në tubime.
“Në 43 raste është vërejtur prania e nëpunësve civil dhe makinave të shtetit të përdorura nga zyrtarë të ndryshëm. Në këtë drejtim kryeson PDK, si njëra ndër partitë, që ka shfrytëzuar më së shumti apo 26 raste nga 43 të evidentuara. PDK po ashtu në shtatë raste ka përdorur gjuhën e urrejtjes kur ka mbajtur takime. Gratë vazhdojnë të jenë në numër të pakët në këto evente të partive politike, përkatësisht vetëm me 10 për qind. Fëmijët po vazhdojnë të marrin pjesë në fushatë, janë konstatuar në të paktën 236 aktivitete. Ndërsa numri i fëmijëve që angazhohen është rreth 2 mijë. LDK kryeson në këtë drejtim, pasuar nga LVV dhe PDK”, tha Spahija. /tesheshi.com/
