Si pjesë e fushatës për zgjedhjet presidenciale në nëntor, Presidenti i Trump edhe njëherë vlerësoi dyshen ballkanase Hoti-Vuçiç, për marrëveshjen e tyre në Uashington në fillim të muajit.
“Kosova dhe Serbia kanë vrarë njëri-tjetrin për vite me rradhë. Ata vetëm vrisnin njëri-tjetrin. Ata nuk pajtohen. Si Izraeli me palestinezët. Unë u thashë atyre se pse po luftoni dhe po vrisni njëri-tjetrin?
Ato kanë shumë dallime, përfshirë këtu edhe dallimet fetare.
Unë u thashë atyre: ‘çfarë po bëni?’ Ne bëjmë tregti me të dy, kështu që kemi një farë fuqie. Unë u thashë: ‘dëgjoni, le të bëjmë një marrëveshje, le të krijojmë paqe ekonomike, dhe për këtë arsye edhe paqe në përgjithësi. Ata erdhën në zyrën time, në Zyrën Ovale për të nënshkruar. Ata u përqafuan, ishte mirë që i pashë. Ne shpëtuam shumë jetë”, tha Trump në tubimin parazgjedhor në Pensilvani.
Fushata për zgjedhjet presidenciale në Amerikë po nxehet, dhe Donald Trump po u shpjegon meritat e tij të mëdha zgjedhësve. Midis tyre është fakti se ai po sjell paqe në botë, prandaj u emërua dy herë për Çmimin Nobel për Paqe, së bashku me qeveritë e Kosovës dhe Serbisë.
Ai shpjegoi se palët ndërluftuese në konfliktet botërore tani po vijnë tek presidenti amerikan, duke kërkuar që Shtetet e Bashkuara të ndërmjetësojnë në procesin e paqes. /tesheshi.com/
