N/kryetarja e partisë maqedonase në opozitë, LSDM-së, Radmilla Shekerinska në një debat të televizionit Telma me deputetin e partisë shqiptare në pushtet, Xhevat Ademin, ka akuzuar koalicionin VMRO-BDI se trupin elektoral e trajton si numër dhe jo si qenie njerëzore, andaj jo rastësisht sipas saj, një pjesë e konsiderueshme e shqiptarëve tanimë janë pajisur me libreza partiake të LSDM-së.
“VMRO-DPMNE dhe BDI nuk i trajton njerëzit si votuesit e saj, por si viktimë, ku i’u bën shtypje gjatë zgjedhjeve, kurse pastaj i kërcënon për votë, kurse ajo kohë ka kaluar. Dhe votuesit shqiptarë që vijnë te ne, kërkojnë të jenë të njëjtë si të gjithë, në drejtësi, në shëndetësi të mos i reketojnë”, tha Sheqerinska ndër të tjera duke potencuar se ata duhet të kenë drejtën e tyre të zgjedhjes.
Ndërsa Xhevat Ademi nga BDI, ka replikuar me Sheqerinskën duke i thënë se qasje të tilla nuk vlejnë, e që sipas tij është pikërisht LSDM-ja ajo që luan me shqiptarët.
“Fushata është e hapur para nesh, më 11 dhjetor qytetarët do shohim sesi do të mund ndahen. Megjithatë, në vetëdijen e shqiptarëve në Maqedoni, qasje të tilla, platforma të tilla më kanë kaluar, nuk është hera e parë. Pra jeni ju ata të cilët po taktizoni me numra në shpinë të shqiptarëve”, i’a ktheu Ademi akuzat Shekerinskës.
M.Krasniqi – /tesheshi.com/
