Gjatë tubimit të së dielës të Aleancës për Shqiptarët në Strugë, para qindra qytetarëve vendas, Ziadin Sela, njeri që drejtoj një parti të dalë nga PDSH-ja e Thaçit, atë për Reforma në PDSH, ka akuzuar Ali Ahmetin e partinë e tij, BDI, se duke qenë në pushtet i kanë falur tokë shqiptare kishës ortodokse në Strugë.
Ai pyeti publikisht Ali Ahmetin se sa tokë shqiptarësh aty i ka dhënë Kishës Ortodokse, duke vënë theksin në dukurinë e çuditshme që po ndodh në Strugë, ku shteti në dy vitet e fundit i ka kthyer Kishës me mijëra hektarë tokë në vendet më të mira të qytetit dhe fshatrave përreth.
“Më thuaj Ali, sa toka i ke dhënë kishës vetëm brenda këtyre dy viteve? Toka më të mira, që u takojnë struganëve, shqiptarëve të Strugës rreth e rrotull liqenit. Pyete atë ish-kryetarin tënd! Pse ja dha lejen kishës në Oktis dhe i futi oktisarët që të përballen me një shtet?! Edhe unë isha në mesin e tyre dhe do të jem sa herë të jetë e nevojshme. Për këtë do ta kthesh Strugën?! Nuk do t’ia arrish as ti e as këto tjerët sepse Struga pa marrë parasysh a do të jetë Ziadin Sela kandidat për kryetar komune, Struga do të dijë të zgjedhë njerëz të ndershëm e të përgjegjshëm, që Strugën do ta bëjnë parajsë”– u shpreh Sela.
Nga ana tjetër, edhe kandidatja për deputete në zonën e pestë zgjedhore e Aleancës për Shqiptarët, Atina Canoska nga Oktisi, iu kujtoi struganëve që mos e harrojnë qëndrimin ballë për ballë të Ziadin Selës gjatë problemit me kishën në Oktis, të nënshkruar nga Ramiz Merko.
“Ishte Ziadin Sela që doli bashkë me oktisarët kundër asaj kishe”, shtoi Canoska. /tesheshi.com/
