Më në fund, kandidatja e LDK-së për kryeministre e Kosovës në zgjedhjet e 6 tetorit, Vjosa Osmani, ka ofruar një gjetje ligjërimore në komunikimin e saj publik në kuadër të fushatës. E sunduar nga frazat shabllone, ajo e ka cilësuar 6 Tetorin si “Çlirimin e dytë të Kosovës”.
“Sigurohuni të dashur të rinj që vota juaj e parë të shkojë për çlirimin e dytë të Kosovës. Më 6 tetor me votën tuaj të parë, Kosova do të përjetojë çlirimin nga krimi dhe korrupsioni. Do t’i japim fuqi lirisë dhe do t’i përqafojë vlerat e demokracisë”, tha Osmani gjatë një takimi elektoral në Viti.
Nga ana tjetër, Kadri Veseli, kandidat i PDK-së, i është qasur shtimin të popullsëisë, një të mirë sociale që Kosova e ka patur ndër vite, por që po e humb. Ndaj, ai premtoi ndërtimin e 300 çerdheve nëse zgjidhet kryeministër.
“Fokusi im i madh është që të bëhet futja pothuajse obligative nga 0 deri në 6 vjeç. Kam paraparë ndërtimin e 300 çerdheve, të cilat do të jenë pikërisht në këtë qëllim. Pastaj si orientim konservator në të cilën është partia ime dhe unë, familja e luan rolin e jashtëzakonshëm. Fuqizimi i familjes, ne do të stimulojmë me politikat tona lindjen e fëmijës të tretë me 1 mijë euro, lindjen e fëmijës të katërt me 1 mijë e 500 euro. Orientimi ynë është rritja e familjes dhe përgatitja e fëmijëve tanë që të jenë të barabartë me fëmijët evropian, për arsye se edhe konkurrenca, ambienti ku jetojmë është evropian dhe konkurrenca duhet të jetë evropiane”, tha Veseli. /tesheshi.com/
