Nga Blendi Gashi
Partitë kosovare sot kanë hapur zyrtarisht fushatën zgjedhore, por jo të gjitha në Prishtinë. Si rregull, forcat duhet të shkonin aty ku ndihen bastione; dhe kjo është respektuar disi dhe në këtë rast, ndonëse kryeqyteti mbetet gjithnjë joshës.
PDK-AAK-NISMA, në Prishtinë
Nëse këto parti do garonin veçmas, sipas rregullit të pashkruar të bastioneve, e para, PDK-ja duhej të shkonte në Drenicë (Skënderaj apo Drenas), AAK-ja në Dukagjin (Deçan, Pejë apo Gjakovë), e NISMA në Malishevë; por të trija kanë zgjedhur Prishtinë, zemrën e saj, pra sheshin “Skënderbeu”.
Pse? Prirja për të qenë ata rrëmbyesit e qeverisë, meqë dhe fushatën e kanë hapur nën hijen e godinës së saj lartoshe. Parë ngushtë, asnjëra prej tyre nuk e ka bastion kryeqytetin kosovar, pasi kurrë nuk kanë arritur ta qeverisin 18 vjet pas lufte.
LDK, AKR, Alternativa, në Podujevë
Për dallim nga “koalicioni i luftës”, koalicioni tjetër i ashtuqujatur i “paqes”, LDK-AKR-Alternativa, fushatën e ka nisur në bastionin e saj, në Podujevë, komunë të cilën nga që paslufta e udhëheq LDK-ja.
Dhe sigurisht se kjo zgjedhje mund të quhet e qëlluar, pasi në Podujevë LDK-ja çdo herë i mbush sallat plot me simpatizantë, siç ndodhi edhe këtë të mërkurë.
Pra LDK-ja zgjodhi komunën ku më së miri është ruajtur e ashtuquajtura frymë rugoviane.
Arsye tjetër pse Podujeva e jo Istogu i Ibrahim Rugovës, është se aktualisht nga kjo komunë vijnë dy krerët më të lartë të LDK-së, kryetari Isa Mustafa dhe nënkryetari Agim Veliu.
Vetëvendosje, në Gjilan
Si befasi më e madhe mund të merret mosnisja e fushatës në Prishtinë nga ana e Vetëvendosje-s, komunë të cilën e udhëheq. Kjo forcë zgjodhi Gjilanin; por jo krejt pa arsye.
Disa figura kryesore të saj vijnë nga Anomorava, si Aida Dërguti, Glauk Konjufca, Ismajl Kurteshi, e të tjerë.
Tjetër arsye është se VV e konsideron Gjilanin si komunën ku ka përkrahjen më të madhe nga qytetarët pas Prishtinës. U dëshmua kjo edhe në tubimin që e mbajti këtë të mërkurë ku salla ishte e stërmbushur; por veçanërisht në zgjedhjet lokale të 2014-tës ku u radhit e dyta, duke lënë pas PDK-në që për disa vite drejtoi këtë komunë. /tesheshi.com/
