Fushata në Kosovë: pedofilia politike, haptazi

Nga Bashkim Kastrati

Ndryshe nga Shqipëria, ku dallohet një tërheqje nga fenomeni i shfrytëzimin të fëmijëve për qëllime elektorale, ndryshe një pedofile politike, në Kosovë kjo po ndodh haptazi….  

Koha e shkurtër për fushatë elektorale ka mobilizuar maksimalisht partitë politike të Kosovës në takimet e tyre me elektoratin. Në këtë fushatë po investohen mjete të shumta financiare, duke filluar nga billbordet dhe postaret në rrugë, reklamat në portalet informative dhe rrjetet sociale, e deri të reklamat nëpër autobusë dhe taksi. E në këtë fushatë nuk po kursehet as përdorimi i fëmijëve për të siguruar sa më shumë prani tek qytetarët. Në fushata të shumta zgjedhore ka prani të madhe të fëmijëve të vegjël, ndërsa një pjesë e fëmijëve më të rritur rreth 15-16 vjeç shfrytëzohen për të shpërndarë fletushka të subjekteve politike dhe vizitkarta të kandidatëve për deputet.

Ky shfrytëzim i fëmijëve është kundërshtuar nga shoqëria civile dhe organizatat që merren me mbrojtjen  të drejtave të fëmijëve.

Edhe Ministri i Arsimit, Arsim Bajrami ka deklaruar se fëmijët, përkatësisht nxënësit nuk duhet të përdoren për gjatë fushatës elektorale, ndërsa i ka bërë thirrje subjekteve politike që mos përfshijnë fëmijët në asnjë formë në aktivitetet e tyre elektorale.

“MASHT, vë në dispozicion të partive politike gjitha objektet shkollore. Duke pasur parasysh edhe përgjegjësinë që e kanë partitë politike që mos të pengojnë zhvillimin normal të procesit mësimor . Kështu që u bëj apel partive politike që me aktivitete e tyre zgjedhore të kenë kujdese që ato ti përshtaten orarit të përfundimit të turit të parë dhe të dytë në shkolla. Gjithashtu shfrytëzoj rastin si ministër i arsimit të bëjë apel gjitha partive politike t’i kursejnë fëmijët e moshës adoleshente. Fëmijët nën moshën 18-vjeçare, që ata të mos përfshihen në aktivitete zgjedhore. Për shkak se kjo do të ndikoj pak edhe në koncentrimin e tyre në përfundimin e gjysmë vjetorit. Uroj që kjo fushatë të kursejë fëmijët. Fëmijët duhet t’i përkushtohen përfundimit të suksesshme të gjysmë vjetorit. Uroj që pas përfundimit të fushatës të gjithë drejtorët t’i kthejnë shk ollat në gjendje çfarë duhet. Të respektohet plotësisht ligji, i cili parasheh kufizime”, ka thënë ministri Bajrami.

Të mos shfrytëzohen fëmijët për të shpërndarë fletushka partiake

Në lidhje me këtë çështje, Bajram Beqiri, kryetari i këshillit të prindërve të Kosovës ka deklaruar se duke pasur parasysh mundësinë që subjekte apo individë të ndryshëm të bëjnë përpjekje për shfrytëzimin e nxënësve dhe fëmijëve nëpër tubime elektorale si dhe me qëllim të mos politizimit të tyre, Këshilli i Prindërve të Kosovës bënë apel tek partitë politike që të jenë të kujdesshëm dhe të përgjegjshme dhe kurrsesi mos të shfrytëzojnë fëmijët për fushata elektorale, por në vend të saj në programet e tyre politike të fusin sa më shumë projekte për avancimin e infrastrukturës ligjore, teknike dhe teknologjike për përmirësimin e mirëqenies së tyre.

“Fëmijët mos të shfrytëzohen për shpërndarje dhe publikime të posterave, fletushkave apo kartelave të kandidatëve, sepse ato mund të sjellin përçarje dhe konflikt te nxënësit dhe bashkëmoshatarët. Nga përgjegjësit e shkollave dhe institucioneve arsimore kërkojmë që të jenë të përgjegjshëm dhe mos të lejojnë që procesi zgjedhorë të ndikojë në procesin mësimor”, thotë Beqiri.

Ai thotë edhe prindërit duhet që të jenë sa më të kujdesshëm në këtë periudhë, derisa të përfundojë fushata elektorale.

“Këtë thirrje jua drejtojmë edhe prindërve të Kosovës që të informojnë fëmijët e tyre për të mos e ndërprerë procesin mësimor, për pjesëmarrje në fushatat elektorale të partive politike. Mos të lejojnë që fëmijët e tyre të cilët ende janë në zhvillim e sipër të politizohen”, ka thënë Beqiri. /tesheshi.com/