Ditë më parë, në shkollën e mesme teknike të Prishtinës, një bilbord i koalicionit AAK-PSD ishte vënë në oborrin. Po atë ditë, drejtoresha e shkollës “Faik Konica” nisi të bënte fushatë me nxënësit duke u kërkuar mbështetje për punën kryer për tetë vite.
Ndërsa sot, nënkryetari dhe kandidati për deputet i PDK-së, Enver Hoxhaj, u ka folur nxënësve për politikat e PDK-së.
“Një mëngjes i hareshëm në shkollën ‘Jeronim de Rada’ në Ferizaj, ku takova shumë mësimdhënës dhe nxënës, përplot vullnet për të qenë pjesë e ndërtimit të së ardhmes së Kosovës.
Së bashku me kolegët Agim Aliu dhe Elmi Reçica theksova se qeveria e ardhshme e PDK-së do ta ketë prioritet shtrirjen e mësimit gjithë ditor në gjithë Kosovën. Me qëllim të rritjes së cilësisë në arsim, do të sigurohemi që të gjitha shkollat të kenë lidhje internet dhe të gjithë nxënësit të pajisen me tablet.
Në këtë mënyrë, nxënësit tanë do të jenë në hap me nxënësit në shtetet perëndimore dhe do të kenë mundësi që mësimin ta zhvillojnë në hap me trendet inovative botërore”, thuhet në njoftimin e numrit 2 të PDK-së.
Organizatat, të cilat në fokus kanë mbrojtjen e të drejtave të fëmijëve, kanë ngritur zërin kundër keqpërdorimit të fëmijëve për qëllime politike gjatë fushatës zgjedhore.
Keqpërdorime janë evidentuar në rastet si promovimi i kandidatëve për deputetë në shkollat fillore, paraqitja e fëmijëve në mitingjet e partive, si dhe përdorimi i shkollave si shtabe të partive politike. /tesheshi.com/
