Si një aktor tipik politik e jo president, Meta e ka vijuar “fushatën e tij” për 25 prillin, të cilin e pagëzon si “referendum”, duke u takuar, siç thotë, me të rinj që nuk kanë pranuar të largohen nga Shqipërisë.
Sipas Metës, janë ata që do sjellin ndryshimin pas 25 prillit, e nënkuptuar kjo, me riardhjen në pushtet të PD-LSI, ose ndryshe, të katërshes Berisha-Basha dhe Meta-Kryemadhi.
“Shumë i lumtur të prisja sot në Presidencë një grup të rinjsh profesionistë, të diplomuar me rezultate maksimale, në Shqipëri dhe universitete prestigjoze të botës, të cilët nuk e kanë braktisur Atdheun, duke vijuar të japin kontributet e tyre në fusha të ndryshme.
Ndamë shumë ide të vyera mbi objektivat që duhen ndjekur për mbështetjen e të rinjve, veçanërisht për krijimin e të gjitha hapësirave, që ju garantojnë mundësi punësimi dhe karriere, në bazë të meritokracisë, si vetmja mundësi për të frenuar edhe plagën e madhe sociale, shpopullimin.
Shqipëria pa të rinj, është si shtëpia pa fëmijë.
Ndaj u angazhova para tyre, sikundër para çdo të reje dhe të riu të këtij vendi, që do të bëj gjithçka për t’i mbështetur në realizimin e ëndrrave të tyre dhe rikthimit të shpresës për të ndërtuar këtu të ardhmen europiane.
Referendumi i 25 prillit 2021 është rruga më e sigurtë për të realizuar këtë objektiv të përbashkët!”, shkruan ndër të tjera Meta. /tesheshi.com/
