Nga Blendi Gashi
Lidhja Demokratike e Kosovës që në ditën e parë të hapjes së fushatës elektorale për zgjedhjet komunale të 22 tetorit, ka marrë dy goditje jo të vogla që vështirë mund t’i ketë paramenduar se mund t’i ndodhin.
Parita e Isa Mustafës e nisi rrugën për të kërkuar vota nga kryeqyteti ku tuboi të gjithë kandidatët për kryetar komunash me pretendimin që të bëjë një tubim madhështor që do t’i frikësonte kundërshtarët por që dështoi keq pasi nuk arriti të mbushë sallën edhe pse erdhën militantë nga të gjitha qytetet, çka nuk i ka ndodhur kurrë më parë kësaj partie.
Mbetja bosh e një numri jo të vogël të karrigeve la në hije këtë organizim duke dhënë sinjale se LDK-ja mund të mos korrë rezultatet të cilat synon, e veçmas për ta rikthyer Prishtinën ku me Arban Abrashin sfidon Shpend Ahmetin e Vetëvendosjes.
Salla jo e mbushur nuk i ka pëlqyer aspas as ish-zyrtarit të LDK-së, Astrit Haraçija, i cili ka akuzuar Isa Mustafën se e ka sjellë partinë në një gjendje jo të mirë.
“Eh more shoku Isë… a po e sheh veten se në çfarë gjendje na ke çuar, as sallën “1 Tetori” nuk e mbush me gjithë Kosovën në Prishtinë. O,ik, ik, se ne veç pa ty fitojmë. Aman mos e prit 22 Tetorin! Lidhja…Lidhja jote është Riinvesti, Lidhja jote është Pabesia. Ndërsa Lidhja Demokrarike e Rugovës do e mbijetojë edhe këtë sfidë”, ka shkruar Haraçija.
Po ashtu edhe kundërshtarët e LDK-së ironizuan më sallën e pamushur. Njëri ndër ta është deputeti i Vetëvendosje-s, Frashër Krasniqi.
“Ky është kapaciteti i LDK me e ‘mbushë’ sallën ‘1 Tetori’ në Prishtinë, megjithëse i kanë mobilizuar të gjitha degët e Kosovës për këtë tubim”, ka shkruar Krasniqi.
Goditja e dytë…
Por kjo ishte vetëm goditja e parë që ja bëri elektorati kësaj partie. Kurse goditjen e dytë ja bëri familja e presidentit Ibrahim Rugova, ku asnjë anëtarë i kësaj familjeje nuk mori pjesë në hapjen e fushatës gjë nuk ka ndodhur në vitet e fundit. Pra e pranishme nuk ishte as deputetja që hyri në Kuvend përmes listës së LDK-së, Teuta Rugova, vajza e presidentit të ndjerë.
Mungesa e tyre, zakonisht uleshin në rrjeshtat e parë, përveç që e bëri më të zbehtë këtë hapje fushate, por ishte një dush i ftohtë për Mustafën, i cili duket se nuk gëzon mbështetjen as të pjesëtarëve të kësaj familjeje. Ky qëndrim duket se vjen pas jo pak “kërcënimeve” që u thanë nga zyrtarë të partisë gjatë krizës së fundit politike se Teuta nuk është e mirëpritur nëse jep votën “pro” qeverisë Haradinaj.
Por ftohja mes raporteve LDK-familja Rugova mund të ketë ndodhur edhe për shkak se Ukë Rugova, djali i ish-presidentit ka punuar hapur për të ndërtuar koalicionin qeverisës PDK-AAK-AKR ku është parë në takim me kryekuvendarin Veseli, gjithmonë sipas raportimit të mediave kosovare, ju ka premtuar votën e motrës Teuta për qeverinë, edhe pse në seancën për formimin e qeverisë ajo nuk mori pjesë më pas.
Pavarësisht se askush nga LDK deri më tani nuk e ka komentuar mungesën e familjes Rugova, bojkoti i tyre flet qartë dhe njëherësh është një thirrje në heshtje për lidershipin aktual të LDK-së se në këto zgjedhje nuk kanë të drejtë të fitojnë vota duke u thirrur në emrin e Ibrahim Rugovës siç ka bërë ky subjekt në vazhdimësi në zgjedhjet e kaluara.
Mbetet të shihet nëse këto dy goditje që mori në start të fushatës do të ndikojnë për të keq në rezultat, e nëse LDK nuk arrinë t’i mbushë sallat edhe në komunat tjera, atëherë sinjali do jetë se kjo parti po e humb elektoratin tradicional. /tesheshi.com/
