Nga Blendi Gashi
Ibrahim Rugova, edhe pse ka ndërruar jetë për më shumë se dhjetë vite vazhdon të jetë i “pranishëm”, në fushatat elektorale të LDK-së, partisë që e themeloi në vitin 1989, atë kohë si lëvizje.
Sa herë që përmendet emri i tij, simpatizantët e LDK-së elektrizohen aq shumë sa që duken të pavërejtur krerët e gjallë të kësaj partie.
Kështu ndodhi edhe të enjten kur koalicioni LDK, AKR, Alternativa hapi fushatën zgjedhore në Prishtinë.
Rugën e përmendën të gjithë folësit, si Mustafa, Hoti, Pacolli e kryetari i partive popullore evropiane Josep Daul.
“Ne (koalicioni) u bashkuam si në kohën e Ibrahim Rugovës”, tha Mustafa.
Rugovën e përmendi edhe Avdullah Hoti (i nominuar për kryeministër), i cili tha se “ne brezi i republikës duam të qojmë përpara misionin që na është dhënë nga Ibrahim Rugova”.
Kurse Behgjet Pacolli i AKR-së, tha se “ky koalicion do të jetësojë idealin e presidentit Rugova”.
Por kjo nuk është ndonjë e papritur pasi drejtuesit e kësaj partie dhe jo vetëm sa herë gjenden në situata jo të favorshme, përmendin Rugovën dhe kontributin e tij me qëllimin e vetëm të përfitojnë sa më tepër vota.
“Rikthimi i akuzave nga Mustafa ndaj PDK-së”
Pika e dytë e tubimit elektoral në Prishtinë është yryshi i Mustafës për të sharë e hedhur baltë mbi “koalicionin e luftës”, por edhe në drejtim të Vetëvendosje-s dhe këtë e bëri disa herë i vetëdijshëm se e ngjall atmosferen në sallë.
Mustafa tha për PDK-në se “ata u munduan që të na thyejnë por e thyen vetën”, ndërsa shtoi se “PDK e ka kapur shtetin, dhe LDK do të bëjë të mundur shkapjen e tij”
“Nga frika se do t’i mundim, ata u dorëzuan; dhe dorëzohen edhe në këtë fushatë para nesh, sepse ne do të dalim fitues”, ka thënë Mustafa, i cili shtoi se PDK-ja duhet të shkojë në opozitë në mënyrë që Kosova të frymojë lirshëm.
Kurse për Vetëvendosje-n tha se “e kanë bërë Kosovën gaz i botës duke gjuajtur gaz lotsjellës në Kuvend”.
Mustafa lavdoi Behgjet Pacollin për të cilin tha se nuk u zmbraps për të qenë bashkë me LDK-në edhe përkundër kërcënimeve, ndërsa tha se bashkë me të do gjenerojnë zhvillim ekonomik.
“Thumbimet e Hotit për rivalët dhe lavdatat për ekipin e tij”
Edhe Avdullah Hoti, kandidat për kryeministër, ashtu si edhe Mustafa thumboi rivalët politik duke e quajtur koalicionin PDK, AAK, AKR, koalicion të frikës dhe të premtimeve të kota, kurse LDK-në dhe partnerët e saj koalicion të shpresës.
Ai lavdoi ekipen e tij duke thënë se kandidatët për deputet janë njerëz të dijës që kanë punuar shumë.
“Ky është ekip i vlerave dhe traditave të Kosovës. Ata kanë listë të interesave ne kemi listë të njerëzve të eksperteve me duar të pastërta. Koalicioni ynë është i natyrshëm”, ka thënë ai, ndërsa ka radhitur një numër premtimesh si; buxhet 3 miliardë euro gjatë mandatit, zhvillim ekonomik, ulje të papunësisë, rritje të pagës, të pensioneve etj.
Në këtë tubim një fjalë rasti e mbajti edhe kryetari i partive popullore evropiane Josep Daul i cili tha se “vetëm LDK-ja që mund të luftojë korrupsionin, dhunën, dhe për ta dërguar Kosovën drejt Evropës”, ndërsa u shpreh i bindur se më 11 qershor qytetarët do ta zgjedhin LDK-në.
Fjalë rasti mbajtën edhe kryetarët e partive tjera, Behgjet Pacolli i AKR-së, Mimoza Kusari-Lila dhe Ilir Deda të Alternativa-s dhe kryetari i Lëvizjes për Drejtësi, Sylejman Çerkezi që u shprehën të bindur se do triumfojnë në zgjedhjet e 11 qershorit. /tesheshi.com/
