Fushata, Albin Kurti në Xhaminë e Çarshisë në Prishtinë: as kushtet minimale për vizitë!

Të gjithë ata që duan t’i hedhin një sy Xhamisë së Çarshisë në Prishtinë, duhet të kalojnë nëpër një dërrasë që të çon në objektin ende të papërfunduar nga restaurimi.

Kjo është njëra nga vërejtjet që i bëri sot kandidati për kryeministër i Vetëvendosjes, Albin Kurti, i cili bashkë me dy kandidatët për deputet, Hajrulla Çeku, dhe Yll Rugova, kanë vizituar Xhaminë e Çarshisë në Prishtinë.

Kurti kritikoi autoritetet e Ministrisë së Kulturës që restaurimin e xhamisë e kanë stërzgjatur, duke rrezikuar trashëgiminë kulturore në vend.

“Këtu gjendemi në xhaminë afër Kuvendit të Kosovës e cila daton që 6 shekuj, restaurimi i të cilës është stërzgjatur. Ky nuk është problemi i vetëm, por edhe mungesa e një pikë qendrore turistike në këtë xhami. Edhe në vendet e ndryshme të botës ekzistojnë vende të trashëgimisë kulturore. Këtu nuk ekzistojnë as kushtet minimale për vizitë në këtë xhami”, tha Kurti.

Por vizita në xhaminë e moçme solli edhe krahasime jo të duhura nga kandidati për deputet, Yll Rugova, i cili paraqiti paralele mes Aja Sofias – xhamisë muze të Stambollit, dhe Xhamisë së Çarshisë, funksioni i së cilës është fillimisht për nevojat rituale të besimtarëve.

Xhamia e Çarshisë është një ndër objektet e para të ndërtuara në Prishtinë, e cila thuhet të jetë ndërtuar kah viti 1391. /tesheshi.com/