Një lloj prononcimi i Arben Ahmetajt për gazetarë të RAI 3, në rrethana të një kamere të fshehtë, edhe pse duket qartë që ishte e stisur, po ngre sërish pluhur mediatik e politik.
Ish-numri dy i qeverisë, tashmë në arrati në Zvicër pas akuzave nga SPAK për fshehje pasurie, ka pretenduar se ish-shefi i tij politik, kryeministri Rama, është takuar në zyrën e tij me mafiozë, apo se ka kanabizuar vendin. Pra, si për të shkuar në përfundimin e RAI-it se Shqipëria udhëhiqet nga një narkoshtet.
Rama e ka nisur ditën pikërisht duke reaguar ndaj kësaj akuze ndaj tij, të cilën cinikisht e ka përkthyer si akuzë ndaj Shqipërisë. Ai gjithashtu nuk e përmend fare ish-vartësin e tij akuzator.
“U mbars mali polli një mi dhe tani minj, hardhuca e zhapikë kanë kohën e ahengut të fitores në humbje!
Është koha e daljes së shpirtit të së keqes që mpaket e çirret, ndërkohë që Shqipërinë as e ndal dot më kush dhe as e nëpërkëmb dot më askush”, shkruan ai.
Nga ana tjetër, socialisti me viet afër Ramës, Eduart Shalsi, e ka komentuar kështu ish-kolegun Ahmetaj: “Unë mund të them që kam qenë pjesë e vendimmarrjeve të rëndësishme. Kam parë debate. Nuk e kam dëgjuar kurrë këtë njeri të bëjë debat, jo më të ngrejë çështje shqetësuese”. /tesheshi.com/
