Mes fuqive të mëdha është rënë dakort për një ndërprerje të luftimeve në Siri që duhet të fillojë brenda javës. Por kjo ndërprerje e luftimeve nuk i përfshin ISIS-in dhe Frontin en-Nusra.
Pas bisedimeve të gjata në Mynih, sekretari amerikan i Shtetit deklaroi në një konferencë shtypi se fuqitë ishin pajtuar mbi një plan që kishte potencialin për ta ndryshuar jetën e përditshme të sirianëve.
“Sot, në Mynih, ne besojmë se kemi bërë përparim në frontin humanitar dhe në frontin e ndërprerjes së luftimeve,” ka thënë John Kerry. Por ai tregoi dhe skepticizëm kur deklaroi se, “Çka na nevojitet të shohim në ditët e ardhshme janë veprimet në terren.”
Përndryshe, ministri i jashtëm rus njoftoi se vendi i tij nuk do t’i ndalë sulmet ajrore në Siri, duke thënë se ndërprerja e luftimeve nuk vlen për ISIS-in dhe en-Nusran.
“Forcat tona ajrore do të vazhdojnë të veprojnë kundër këtyre organizatave,” u shpreh Lavrov.
Ndërsa në vend të fjalës “armëpushim” u zgjodh të përdorej togfjalëshi “ndërprerje e luftimeve”, sekretari i Jashtëm britanik, Philip Hammond, deklaroi se përfundimi i luftimeve mund të ndodhte vetëm nëse Rusia do t’i ndalonte sulmet ajrore në mbështetje të forcave qeveritare. /tesheshi.com/
