Nga mesi i një dite të gjatë pune, apo gjatë kohës sa jemi në shkollë, shumica prej nesh i drejtohemi një filxhani kafeje, për pak ekstra energji.
Por në fakt, mbyllja e syve,qoftë edhe për disa minuta, mund të ketë efekt shumë më pozitiv në shëndetin tonë emocional, mendor apo fizik.
Në ditarin e Wall Street Journal të titulluar, “Si të bëjmë një sy gjumë në formën më perfekte”, studiuesit sugjerojnë që për të qenë një dremitje e dobishme, varet se çfarë dëshirojmë me atë dremitje.
Që një dremitje të jetë perfekte, nuk është e domosdoshme të zgjasë shumë.
Sipas një studimi të vitit 2012, një dremitje prej 10 deri 20 minutash, është ideale për të përmirësuar përqendrimin e njeriut dhe produktivitetin e tij.
Hulumtuesit kanë gjetur se një dremitje prej 10 minutash ka rezultuar me shtim të energjisë, largim të përnjëhershëm të lodhjes e molisjes.
Në anën tjetër, dremitja në kohëzgjatje prej 30 minutash, mund të shkaktojë një dezorientim dhe reagim të ngadaltë në momentin kur zgjohemi dhe kjo gjendje mund të zgjasë edhe 30 minuta pas zgjimit, para se dremitja të fillojë të jap efektin e saj pozitiv për organizmin.
Një studim i kryer në vitin 2015, ka gjetur se dremitja deri në 30 minuta mund të rregullojë vlerat hormonale, të cilat mund të jenë çrregulluara nga një gjumë jo i rehatshëm gjatë natës. Shkencëtarët në fakt, kanë gjetur se dremitja mund të përdoret për të rikthyer vlerat e biomarkerëve neuroendokrin dhe imunologjik në suaza normale.
Mbyllja e syve deri 60 minuta, po ashtu na ndihmon të ndjehemi të freskët dhe të ripërtrirë. Kjo dremitje ndikon në përmirësim të kujtesës, pra kur na duhet të sjellim në kujtesë faktet, fytyrat apo emrat e caktuar.
Ky lloj i dremitjes po ashtu ndikon në përmirësimin e vigjilencës, për një kohëzgjatje prej 10 orësh.
I vetmi disavantazh i kësaj dremitje, është mundësia për t’u zgjuar me ndjenjë të çorientimit apo konfuzionit.
Dremitja për më shumë se 90 minuta është në fakt një cikël i plotë i gjumit, dhe përfshin fazën REM dhe fazën e gjumit të thellë. Kjo lloj dremitje kthjellon mendjen, freskon kujtesën dhe e kompenson gjumin e humbur, ta zëmë gjatë natës së kaluar.
Interesant është fakti se dremitja e cila përfshin një cikël të plotë gjumi na mundëson të zgjohemi më lehtë, pa ndjenjën e ç‘orientimit dhe konfuzionit.
Pjesa e ditës kur bie vigjilenca, memoria dhe reflekset është periudha rreth orës 15:00, andaj është e njohur se disa vende të Amerikës Jugore kanë kohën e dremitjes të njohur si “siesta”, pikërisht prej orës 13.00 deri në 16.00 të pasdite.
Është me rëndësi të nënvizohet fakti se dremitja në pjesën e fundit të ditës mund të interferojë me gjumin tonë të natës, dhe ta çrregullojë orën tonë biologjike.
Andaj kujdes kur e përzgjidhni kohën për t’u dremitur. /tesheshi.com/
