Ndërsa prej kohësh eksponentë të ndryshëm të LSI-së i akuzojnë hapur qeverinë dhe ministra të veçantë të Edi Ramës, vetë kryeministri thotë që koalicioni funksionon.
Kur Ylli Manjani e akuzoi qeverinë për “korrupsion politik”, Rama e bëri ministër pas dy javësh.
Kur Luan Rama, numri tre i partisë së Ilir Metës, e sulmoi qeverinë për abuzime, Petrit Vasili, kolegu i tij, tha se është thjesht mendimi i tij personal.
Kur deputetë të LSI-së shkruajnë fjalime dhe botojnë opinione opozitare, reagimi bie në vesh të shurdhër.
Por sot situata është më alarmante. Një këshilltar shumë i afërt i Ilir Metës e ka sulmuar tepër ashpër kryetarin e bashkisë së Tiranës, Erion Veliajn, njeriun që u zgjodh në atë post falë aleancës me LSI-në.
Ralf Gjoni, ndihmësi i kryetarit të Kuvendit për protokollin dhe marrëdhëniet me jashtë, ka lëshuar një lumë akuzash dhe mallkimesh ndaj eksponentit të lartë të mazhorancës Erion Veliaj. Dhe nuk bëhet fjalë për kritika normale, por për akuza të qarta dhe dukshëm mllefi e kundërshtimi antagonist.
Ja ç’thotë Ralf Gjoni në faqen e tij në Facebook:
“O MIQ! Arroganca dhe snobizmi i lidershipit te Bashkise se Tiranes qe sot u rikonfirmua serish nga
dhuna e patolerueshme dhe e panevojshme e Policise Bashkiake ndaj qytetareve qe mbrojne hapesirat e gjelberta, me sugjeron se ky kryebashkiak do kete nje mandat shume problematik, mbushur me konflikte e plot mllef. Nese nuk reflekton e nuk nderron sjellje, gjasat jane qe rrugetimi i tij tashme i minuar, te krijoje rrezik per projektet e tjera te nevojshme per Tiranen qe duhet te zbatoje Bashkia ne cdo skaj te qytetit. Shume energji e humbur e shume helm per asgje. Vetem nderhyrje ne park, injorim i procedurave dhe legjislacionit ne fuqi dhe 500,000 Euro te hedhura kot per nje kokefortesi infantile e cila nuk permireson aspak mireqenien dhe jeten e perditshme te kryeqytetareve…”
Gjithçka do të ishte ndryshe nëse z.Gjoni do të ishte një politikan i një niveli më të pavarur, pra, deputet apo përfaqësues tipik politik. Por ai është këshilltar dhe njeri i afërt me kryetarin e LSI-së. Pra, vetë puna e tij nuk ia lejon indipendencën e një opinioni të shpallur politik. Dhe pse është normale që ta ketë; jemi në një vend demokratik.
Natyrshëm ky opinion do të merrej si një reflektim apo rezonancë e qëndrimeve të shefit. Koncepti se bëhet fjalë për indipendencë anglosaksone në një forcë politike monolite si LSI-ja nuk ka shumë bazë besueshmërie edhe në qoftë e vërtetë.
Pra, ka më shumë se një arsye për të besuar se kemi të bëjmë vërtet me një problem real në koalicionin qeveritar, që tashmë ka shpërthyer më me furi… Po vjen pranvera, ndoshta dhe zgjedhjet. /tesheshi.com/
