Për takimin Basha- Rama tashmë ka një negociator, mbetet vetëm vendi dhe ora e takimit që të dy ia kanë lënë njëri-tjetrit në dorë. Ky takim mund të realizohet këtë fundjavë…
Presidenti Bujar Nishani ka dalë sot në rolin e negociatorit duke u bërë thirrje palëve politike të ulen në tryezën e dialogut me axhendë serioze. Nishani nëpërmjet zëdhënëses së tij shprehu angazhimin e tij për një dialog politik, por nuk guxoi të linte një orë dhe një vend për këtë tryezë duke e lënë në dorën e Ramës dhe Bashës për t’a vendosur.
Të dy kundërshtarët gjatë ditës së sotme kanë folur për dialog. Pavarësisht gjuhës së ashpër të përdorur ndaj njëri-tjetrit dhe lënies së topit në derën e njëri-tjetrit për orën dhe vendin e takimit, për një gjë kanë rënë dakord: për takimin mes tyre.
Burime nga opozita dhe kryeministria bëjnë të ditur për tesheshi.com se negociatat mes stafeve për këtë takim vijojnë pa ndërprerje dhe nuk është çudi që takimi të mbahet këtë fundjavë para mbërritjes në Tiranë të zyrtarit të lartë gjerman, zv/kancelarit Sigmar Gabriel.
Në pritje të këtij takimi, kryeministri Rama ka anulluar sot një vizitë dy-ditore të planifikuar për në qytetin e Korçës, ku do të përuronte disa investime qeveritare. Axhenda e tij e përpiluar për të shtunën dhe të dielën është anuluar sot pasdite, bëjnë të ditur burime kryeministrore.
Ndërkohë, Ilir Meta ka nisur të bëjë lëvizjet e tij duke kërkuar që të jetë pjesë e këtij takimi. Ai mblodhi Këshillin Drejtues të partisë dhe me anë të Luan Ramës e hodhi “shashkën” se mund të krijohej një qeveri e re e të majtës pa Ramën kryeministër.
Deklaratat që i paraprijnë takimit
“Përcakto negociatorin për pikat për të cilat ramë dakort javën e shkuar, zgjidh vendin dhe orën dhe hajde, t’i japim shqiptarëve zgjedhje të lira dhe të ndershme”, u shpreh kreu i PD-së, Lulzim Basha sot. Pothuajse në të njëjtën orë pak metra më tutje nga zyra e Kryeministrisë, kryeministri Edi Rama po përsëriste fjalën dialog. “Opozita po saboton çdo përpjekje të qeverisë për dialog. Sot unë jam përsëri për dialog, që të ulemi në tryezë pa kushte për dialog me median apo pa median, sipas dëshirës së Lulzim Bashës dhe Partisë Demokratike”, tha Rama duke folur për përpjekjet pa sukses të stafit të tij këtë javë.
Ndërkohë, vetëm 2 orë më vonë ishte presidenti Nishani që kërkoi prej palëve uljen në tryezë duke bërë të qartë rolin e negociatorit në këtë tryezë.
I vetmi moment që po mban peng këtë takim është kushti i vendosur nga opozita që të diskutohet për qeveri teknike. /tesheshi.com/
