Trupat e një çifti që nisën një udhëtim me vela nëpër Oqeanin Atlantik janë gjetur në një varkë shpëtimi, gati gjashtë javë pasi u panë për herë të fundit.
Britanikja Sarah Packwood dhe burri i saj kanadez Brett Clberry me sa duket braktisën varkën e tyre dhe vdiqën përpara se të mbërrinin në ishullin Sable pranë Nova Scotia, Kanada më 12 korrik.
Çifti u raportua i zhdukur më 18 qershor pasi u nisën nga Nova Scotia me varkën e tyre me vela miqësore me mjedisin, Theros, një javë më parë. Ishin rrugës për në Azores, rreth 3,228 kilometra larg, me udhëtimin që zgjati 21 ditë.
Në një postim në Facebook, djali i Clberry, James, konfirmoi vdekjen e çiftit, duke thënë se ditët e fundit kanë qenë “shumë të vështira”. Ai shtoi se çifti do t’i mungojë, duke theksuar se “nuk ka asgjë që do të mbushë boshllëkun e lënë nga vdekjet e tyre të pashpjegueshme deri më tani”.
Është e paqartë sesi udhëtimi i ëndrrave të çiftit përfundoi në tragjedi. Hetimi është ende në vazhdim, i tha BBC-së sot Policia Mbretërore Kanadeze.
Një skenar që po shqyrtojnë hetuesit është se varka me vela u godit nga një anije mallrash që kalonte që nuk e vuri re përplasjen, sipas uebsajtit kanadez Saltwire. Sipas një burimi të paidentifikuar që foli për Saltwire, “ekuipazhi i varkës me vela ose nuk ishte në gjendje të shmangte përplasjen” ose mund të ketë qenë nën kuvertë me Therosin në autopilot. Rojet bregdetare kanadeze dhe avionët ushtarakë nuk kanë zbuluar asnjë shenjë të anijes.
Në një video të postuar në kanalin e tyre në YouTube, Theros Adventures, dyshja shpjeguan se si udhëtimi i tyre – të cilin ata e kishin quajtur Odisea e Gjelbër – do të mbështetej në velat, panelet diellore, bateritë dhe një motor elektrik nga një makinë.
“Ne po bëjmë gjithçka që mundemi për të treguar se ju mund të udhëtoni pa djegur lëndë djegëse fosile,” tha Clberry në videon, e cila u postua më 12 prill. “Është ndoshta aventura më e madhe e jetës sonë deri më tani”, shtoi Packwood. /tesheshi.com/
