Pasi iu shpëtoi disa atentëteve, një ndër emrat e njohur të krimit në Fushë Krujë, Gentjan Bejtja, është gjetur i pajetë pranë banesës së tij në fshatin Larushk. Sipas të dhënave paraprake, Bejtja është qëlluar me breshëri automatiku.
Pak muaj më parë u vra edhe kunati i tij Ramazan Sino, si dhe iu plagosën dy fëmijët 13 dhe 8 vjeç, në atë që ishte atentati i tretë ndaj këtij ish-polici burgu, me emrin e të cilit lidhen disa ngjarje të rënda kriminale.
Gjithashtu në 9 janar të vitit 2022, Gentian Bejtja i shpëtoi një atentati me breshëri kallashnikovi në afërsi të Niklës, por u plagos në krah miku i tij 31-vjeçar Klodian Stafuka i cili ndodhej me të në makinë gjatë momentit kur ndaluan për të furnizuar makinën në një pikë karburanti.
Tjetër atentat Ndaj Gentian Bejtjas ishte ai i 10 Janarit 2022, ku ai mbeti i plagosur në krah.
Gjithashtu në shtator të vitit 2016, ndaj tij është organizuar një atentat me tritol. Bejtja po udhëtonte me makinën e tij tip “Tuareg”, në fshatin Nikël të Krujës, kur nga poshtë mjetit shpërtheu eksplozivi që e dëmtoi rëndë në këmbë.
Në një deklaratë për media lidhur me ekzekutimin e tij, Policia e Shtetit thotë shkurt: “Më datë 15.03.2024, në fshatin Larushk, Krujë, nga persona ende të paidentifikuar është vrarë me armë zjarri shtetasi G. B.
Një grup i posaçëm hetimor, nën drejtimin e Prokurorisë, vazhdon punën për sqarimin e rrethanave të ngjarjes, identifikimin dhe kapjen e autorëve të dyshuar”.
Thuhet se Gentian Bejtja ka qenë prej tetë muajsh në kërkim dhe është kthyer dje në banesë, aty ku jetonte vetëm e ëma, pasi të gjithë familjarët ndodhen jashtë. Pikërisht këtë kthim, ai dhe është hequr qafe nga hasmërit e tij.
Viktima është hetuar për vrasjen e kryekomisarit Dritan Lamaj, pasi u dyshua bashkë me Enver Stafukën, si një nga autorët e vjedhjes së makinës nga e cila u vra Lamaj në shkurt 2013.
Gjithashtu, ai është shoqëruar më parë edhe për dy atentate, atë të vrasjes së Ilias Çalit në autostradën Tiranë-Durrës, në prill të 2022-it dhe atentatit ndaj Marklen Hakës në qershor 2022, por nuk u gjetën prova për ta fajësuar si autor të dyshuar.
Po ashtu, Gentian Bejtja përflitet se ka qenë i pranishëm në momentet e rrëmbimit të Enver Stafukës, më 8 shkurt 2015. Stafuka u rrëmbye në zonën e Fushë Krujës dhe u zhduk pa gjurmë prej atij momenti. Në vendin e ngjarjes, ishte edhe Durim Bami dhe Ramazan Rraja. Fati i Stafukës nuk u zbulua asnjëherë përgjatë kësaj dekade.
