Kreu i katolikëve shqiptarë, George Frendo, i ka bërë thirrje grigjës së tij (bashkësisë së besimtarëve) për të agjeruar, kjo në funksion të qetësimit të situatës së trazuar politike. Thirrja e klerikut më të lartë katolik në Shqipëri, vjen ndërsa bashkësia e besimtarëve muslimanë ndodhet në ditët e fundit të një muaji agjerimi, siç është Ramazani.
“Ne, si Ipeshkvinj katolikë, si edhe Këshilli Ndër-fetar, kemi shprehur shqetësimin tonë për situatën e krijuar, dhe i kemi bërë apel politikanëve tanë që të gjejnë rrugën e duhur për zgjidhjen e kësaj krize, duke pasur parasysh të mirën e përbashkët më shumë se sa të mirën e partisë ose vetjake, dhe duke ndjekur rrugën e dialogut.
Fatkeqësisht, zërat tanë kanë mbetur si një zë në shkretëtirë dhe po ecim drejt vetëvrasjes së kombit.
Në Shkrimin Shenjt lexojmë shumë herë se në periudha dhe situata të vështira, populli i Hyjit në Besëlidhjen e Vjetër (domethënë para ardhjes së Jezu Krishtit), por edhe pas ardhjes së Zotit Jezus, besimtarët i janë drejtuar Hyjit me lutje dhe agjërim.
I frymëzuar nga këto mësime nxis të gjithë besimtarët e dioqezës sonë që të premten e ardhshme ta mbajnë si ditë agjërimi dhe lutjeje për një zgjidhje paqësore për vendin tonë”, thuhet në deklaratën e George Frendos, apo ndryshe Gjergj Frendos. /tesheshi.com/
