Donald Trump nuk është më mik i ish-kryeministrit izraelit Benjamin Netanyahu, të cilin ai e akuzon se e ka tradhëtuar kur e uroi Joe Biden për fitoren e tij në zgjedhje vitin e kaluar: “Le të persekutohet!”, i tha ai.
Ish-presidenti amerikan e tha këtë në një intervistë me gazetarin izraelit Barack Ravid, i cili po përgatit një libër mbi marrëdhëniet izraelito-amerikane gjatë mandatit të Trump, shkroi gazetari në portalin e lajmeve Axios të premten.
“Donald Trump dhe Benjamin Netanyahu ishin aleatë të ngushtë politikë për katër vjet ndërsa ishin në pushtet, të paktën në publik”, shkruan Ravit. “Tani mbaroi.”
Gazetari shton se është takuar dy herë me Donald Trump për librin e tij “Trump’s Peace: Marrëveshjet e Abrahamit dhe transformimi i Lindjes së Mesme”.
Të dyja herë, ish-presidenti amerikan, i cili nuk e pranoi kurrë humbjen elektorale, kritikoi ashpër Netanyahun, sot liderin e opozitës izraelite.
“Më pëlqeu Bibi. Më pëlqen akoma. Por më pëlqen edhe besnikëria. Personi i parë që uroi Biden ishte Bibi. Dhe jo vetëm që e uroi, por bëri edhe një video në lidhje me të”, tha Trump në prill.
“Ai ishte ndër të parët. Që atëherë nuk kemi folur. Le të ndiqet penalisht”, shtoi ai.
Donald Trump vlerësoi se ai kishte bërë më shumë për Izraelin dhe për Netanyahun se çdo president amerikan.
Ai përmendi tërheqjen e Shteteve të Bashkuara nga marrëveshja për programin bërthamor të Iranit në vitin 2015, zhvendosjen e ambasadës amerikane në Jerusalem, qëndrimin e forcave amerikane në rajon dhe njohjen e sovranitetit të Izraelit mbi Lartësitë Golan.
Netanyahu reagoi me një deklaratë dërguar Axios-it, duke thënë:
“Unë e vlerësoj shumë kontributin e madh të Presidentit Trump për Izraelin dhe sigurinë e tij”, tha ish-kryeministri. “Por unë e kuptoj gjithashtu rëndësinë e një aleance të fortë midis Izraelit dhe Shteteve të Bashkuara dhe kjo është arsyeja pse ishte e rëndësishme për mua të përgëzoja presidentin e sapozgjedhur”. /tesheshi.com/
