Arabia Saudite dhe aleatët e saj arabë (Emiratet e Bashkuara Arabe, Bahreini dhe Egjipti) kanë rënë dakord të rinovojnë lidhjet e plota diplomatike dhe tregtare me Katarin, e kjo pas një bllokade trevjeçare. Ndodhi kjo në samitin e Këshillit të Bashkëpunimit të Gjirit (GCC) të martën. Si përgjigje, Doha ndaloi të gjitha veprimet ligjore që ky shtet nisi kundër këtyre vendeve.
Katërshja akuzoi Katarin tre vjet më parë, ndër të tjera, për mbështetjen e grupeve terroriste dhe lidhje të ngushta me Iranin, gjë që Doha e ka mohuar.
Abdulkhaleq Abdullah, një akademik pranë familjes në pushtet në Emirate, i tha British Financial Times se Katari kishte fituar një konflikt të pakuptimtë dhe se kostoja e këtij konflikti ishte e madhe.
“Mund të thuash që Katari fitoi. Kostoja e konfliktit është shumë e lartë; ishte tre vite e gjysmë më të keqia në historinë e Këshillit të Bashkëpunimit të Gjirit,” tha profesori Abdulkhaleq Abdullah.
Anwar Gargash, ministri i shtetit i Emirateve të Bashkuara Arabe, tha se një “marrëveshje e mirë” është arritur, duke shtuar se “ne do të shohim zbatimin e shumë masave të marra shumë shpejt”.
“Unë jam shumë optimist, por sigurisht që rindërtimi i besimit kërkon kohë, kërkon pak energji,” i tha ministri Gargash për CNN. “Emiratet e Bashkuara Arabe janë të gatshme të bëjnë gjithçka për të rindërtuar urat.”
Por çfarë do të ndodhë me intelektualët e shumtë dhe studiuesit muslimanë që janë në burgje sepse ata e kanë kundërshtuar publikisht këtë konflikt të pakuptimtë?
Dihet që Arabia Saudite, pasi vendosi bllokada dhe nisi një fushatë kundër Katarit, arrestoi intelektualë të shumtë dhe studiues fetarë që kundërshtuan publikisht konfliktin. Një ndër ta është Shejh Selman Al Awde. A do të lirohen tani dhe kush do të jetë përgjegjës për dëmtimin e njerëzve të pafajshëm? /tesheshi.com/
