Nga Blendi Gashi
Zgjedhet e jashtëzakonshme të mbajtura më 4 dhjetor në Drenas ku nuk nxorrën fitues asnjë parti në raundin e parë, komunë kjo që nga paslufta është fituar bindshëm nga PDK-ja, ka thyer pothuajse përfundimisht bastionet e krijuara nga subjektet politike në Kosovë.
Pas thyerjes së Prishtinës që u qeveris për 14 vjet nga LDK-ja, më herët thyerja e bastioneve në komunat e Dukagjinit që dominoheshin kryesisht nga AAK-ja, si Gjakova, dhe tashmë së fundmi balotazhi në Drenas, tregojnë qartë se partitë politike duhet t’i mveshin mëngët dhe të punojnë seriozisht nëse në zgjedhjet lokale që mbahen vitin e ardhshëm dëshirojnë të mbajnë komunat që qeversin aktualisht, pasi mund t’i humbasin lehtë ato.
Megjithatë, janë ende disa komuna që nga paslufta që qeverisen nga e njëjta parti.
Istogu, Fushë Kosova, udhëhiqen nga LDK-ja kurse Skenderaj, përfshi këtu edhe Drenasin nga PDK-ja.
Por, edhe në këto komuna, përjashto këtu Skenderajn (gjasat janë shumë të vogla të mos qeveriset nga PDK), qytetarët më së largu vitin e ardhshëm me votën e tyre mund t’i thonë përfundimisht stop monoploeve partiake në komuna.
“Ndryshime të mëdha në komuna në zgjedhjet lokale të 2017-tës”
Njohës të rrethanave politike në vend, por edhe deputet shprehen se koha e thyerjes së monopoleve partiake në komuna ka mbaruar dhe të gjitha partitë pa dallim duhet ta kenë të qartë se nuk mund të llogarisin se ndonjë komunë të caktuar mund ta fitojnë me “duar në xhepa”.
Analisti politik, Nexhmendin Spahiu, thotë se në zgjedhjet e ardhshme lokale mund të ndodhin shumë befasi dhe parti të caktuara lehtë mund të humbin komuna që për vite i kanë qeverisur.
“Pritet ndryshim i skenës politike (qeverisjes në komuna) . Tani voton gjenerata që nuk e ka përjetuar luftën që për të di vetëm nga historia”, ka thënë Spahiu, për tesheshi.com.
Islam Krasniqi, njohës i rrethanave politike në vend, thotë se balotazhi në Drenas tregon më së miri se nuk ka më bastione të pathyshme, as çerdhe të partive politike.
Krasniqi, thotë se populli është vetëdijësuar dhe më nuk bie lehtë pre e gënjeshtrave, të analfabetëve, të cilët punuan dhe po punoinë vetëm për interesa personale apo të grupeve të caktuara klanore.
“Shkuarja e PDK-së në balotazh është humbje për PDK-në jo vetëm në Drenas por në nivel të Kosovën, sepse Drenasi është parametër në nivel të Kosovës. Balotazhi është diçka që nuk i jep siguri askujt, ku deri në raundin e dytë gjithçka mund të ndryshoj. Duke e vlerësuar që Drenasi ka qenë bastion i PDK-së që nga pas lufta, edhe këtu u thye heshtja, kjo jep të nënkuptohet se do të priten ndryshime të mdha në zgjedhjet lokale të vitit të ardhshem, ku do të ketë befasi nëpër komuna të ndryshme. Zgjedhjet lokale që do të mbahen në vitin 2017 priten të sjellin ndryshime të mdha në çdo komunë, ku populli do t’i ndeshkoj ata që mashtruan vite me radhë, duke ju premtuar përmisim të mirëqënies sociale, punësim etj”, thotë Krasniqi, për tesheshi.com.
Edhe, deputeti i pavarur, Ilir Deda, mendon se zgjedhjet në Drenas janë fillimi i fundit të monopoleve e bastioneve politike në Kosovë.
“Vetëdijësimi në rritje i qytetarëve e zhbën politikën klienteliste. Demokratizimi që filloi në Drenicë është jashtëzakonisht i rëndësishëm”, ka thënë Deda.
Ndryshe, si mini-bastione të partive konsiderohen, Prizreni e Klina komuna këto që qeverisën për 8 vite nga PDK, Theranda nga LDK (përjashto një mandate që ka qeverisur AAK), dhe Deçani që qeveriset për disa vite nga AAK. /tesheshi.com/
