Kryeministri Rama i është “lutur” sërish kreut demokrat Basha, që të bashkëpunojnë në këtë situatë të pazakontë që po kalon vendi, si pasojë e tërmetit të para një jave.
Reagimi i Ramës vjen pasi Basha i është rikthyer gjuhës së acartë politike, pas ditëve të para të tragjedisë kur shprehej me një gjuhë të kujdesshme dhe të kuruar. Basha ka nisur denoncimin e realiteteve të vështira të atyre që kanë mbetur pa strehë, e për këtë Rama i lutet:
“I dashur Lulzim, asgjë më të keqe s’mund të bëjë një politikan në këto ditë të zymta, se sa të kërkojë raste njerëzish ende të pasistemuar për t’i përdorur për politikë! Ka shumë akoma që duan dorën tonë dhe ngrohtësinë e kujtdo që mundet t’ua japë! Eja të bashkëpunojmë…
Mos u mjafto me fjalët e errëta e me pamjen që dukesh sikur e ke humbur t’i shtëpinë, jo ata fatkeqë që kështu bëhen sfond mediatik, për të përcjellë zymtinë e politikës së stërvjetër, në vend të ngrohtësisë njerëzore! Le t’i ndihmojmë së bashku me pak dritë, se zymti kanë boll”, shkruan shefi qeverisë nga Londra, aty ku ndodhet për samitin e NATO-s.
Orë më parë, Basha i quajti ftesat e disaherta të Ramës si propagandë.
“Kemi bërë një propozim me tre pika. Nuk ka lidhje tryeza dhe tavolina, propaganda është gjë tjetër, realiteti është gjë tjetër. Larg propagandës po ju them, duhet përshpejtuar procesi i vlerësimit, përveçse të shtohen grupet e vlerësimit”, tha Basha. /tesheshi.com/
