Evropa është “aleati ynë”, por nuk mund të jetë një “vasal i përhershëm” i Shteteve të Bashkuara në aspektin e sigurisë dhe tregtisë, tha zëvendëspresidenti amerikan JD Vance në një intervistë me faqen britanike UnHerd të martën.
“Ne e konsiderojmë Evropën aleatin tonë. Ne thjesht duam një aleancë në të cilën evropianët janë pak më të pavarur dhe kjo do të reflektohet në sigurinë dhe marrëdhëniet tona tregtare”, tha Vance, i cili ka sulmuar vazhdimisht liderët evropianë, raporton AFP.
“Nuk është mirë për Evropën dhe nuk është në interesin e Amerikës që Evropa të jetë vasal i përhershëm i Shteteve të Bashkuara përsa i përket sigurisë”, theksoi ai.
Që nga kthimi në Shtëpinë e Bardhë, Donald Trump u ka bërë thirrje evropianëve që të shpenzojnë më shumë për mbrojtjen e tyre dhe ka kritikuar ashpër Bashkimin Evropian, duke e akuzuar atë për një politikë të padrejtë tregtare ndaj Shteteve të Bashkuara.
Vance gjithashtu ka kritikuar vazhdimisht liderët evropianë, duke thënë në një fjalim në Mynih në shkurt se ata nuk po e luftojnë mjaftueshëm emigracionin dhe se liria e fjalës është nën kërcënim në Evropë.
“Realiteti është, është brutale të thuhet, por është e vërtetë, se e gjithë infrastruktura evropiane e sigurisë është subvencionuar nga Shtetet e Bashkuara që kur kam lindur”, tha JD Vance.
Ai shtoi se “me përjashtim të Francës, Mbretërisë së Bashkuar dhe Polonisë, shumica e shteteve evropiane nuk kanë ushtri të afta për të ofruar një mbrojtje të arsyeshme”.
Në fillim të marsit, ai tronditi evropianët duke thënë se për Ukrainën, përfundimi i një marrëveshjeje ekonomike me SHBA-në do të ishte “një garanci më e mirë e sigurisë se 20,000 ushtarë nga një vend që nuk ka bërë luftë për 30 apo 40 vjet”.
“Unë nuk mendoj se një Evropë më e pavarur është një gjë e keqe për Shtetet e Bashkuara,” theksoi ai, duke thënë se ai besonte se një Evropë më e fortë mund të kishte shmangur “katastrofën strategjike” të luftës së nisur në Irak në 2003 nga një koalicion i udhëhequr nga Shtetet e Bashkuara.
Duke iu referuar negociatave midis Londrës dhe Uashingtonit për një marrëveshje dypalëshe ekonomike, Vance tha se ata kanë “një shans të mirë” për të rezultuar në “një marrëveshje të shkëlqyer që do të jetë në interesin më të mirë të të dy vendeve”. /tesheshi.com/
