Ministri për Çështje të Inteligjencës në Izrael, Yisrael Katz në një intervistë për gazetën online të Arabisë Saudite, Elaph, ftoi Princin e Kurorës, Mohammad bin Salman për një vizitë në vendin e tij, informon Hareetz.
Duke përshkruar Arabinë Saudite si udhëheqësin e botës arabe, Katz propozoi që mbretëria do të ishte një sponsor i procesit të paqes izraelito-palestineze. Katz shtoi se Izraeli do të ishte i lumtur të merrte pjesë në negociata të tilla.
Gjithashtu, të mërkurën mbreti Salman i Arabisë Saudite komentoi mbi njohjen e Jerusalemit si kryeqytetin e Izraelit nga ana e Presidentit Trump, duke thënë se palestinezët kanë të drejtë që ta kenë kryeqytet të tyre Jerusalemin Lindor, në shtetin e ardhshëm që do të kenë.
Kujtojmë që muajin e kaluar, Elaph botoi një intervistë të paparë me shefin ushtarak izraelit, gjeneralin Gadi Eisenkot. Ajo shënoi herën e parë që një oficer i lartë i Forcave të Mbrojtjes të Izraelit, të intervistohet nga një media në Arabinë Saudite, e cila nuk ka lidhje diplomatike me Izraelin.
Në intervistë, Eisenkot e quajti Iranin “kërcënimin e vërtetë dhe më të madh për rajonin”. Ai tha se Izraeli dhe Arabia Saudite pajtohen plotësisht në lidhje me synimet e Iranit dhe vuri në dukje se të dy vendet nuk kanë luftuar kurrë njëri me tjetrin. /tesheshi.com/
