Bisedimet e paqes për Sirinë qenë planifikuar të nisnin këtë të hënë, por u shtynë për të premten për shkak të mospajtimit mbi palët e ftuara nga grupet që luftojnë kundër regjimit të Beshar Esadit.
Turqia e ka shprehur hapur qëndrimin e vet kundër thirrjes në këto bisedime të PYD-së, Partisë së Unionit Demokratik, që është simotra e PKK-së, organizatës terroriste kurde, me të cilën ajo është në luftë të hapur.
Duke folur në kanalin televiziv informativ turk NTV, ministri i Jashtëm i Turqisë, Mevlut Çavushogllu, ka deklaruar prerë se vendi i tij do t’i bojkotojë bisedimet nëse ftohen kurdët e PYD-së. Ai e ka quajtur atë një organizatë terroriste, që nuk mund të përfaqësojë popullin sirian.
Të njëjtin qëndrim ka mbajtur dhe kryeministri Ahmet Davutogllu, që në mbledhjen e grupit parlamentar të partisë së tij, AKP-së, ka thënë se Turqia nuk sheh ndonjë ndryshim midis PKK-së dhe përfaqësuesve të saj në Siri, PYD-së dhe krahut të armatosur, YPG-së, Njësive të Mbrojtjes Popullore.
“Ne besojmë se, në lidhje me Sirinë, duhet të jetë një tavolinë në të cilën të ulen së bashku kurdët, arabët, turkmenët, sunnitët, alevitët dhe krishterët. Përfshirja e kurdëve në tavolinë është domosdoshmëri; një tavolinë që i lë jashtë kurdët është e paplotë. Por ne jemi kundër uljes në tavolinë të YPG-së, që po i shtyp vetë kurdët,” ka thënë Davutogllu.
Ndërkohë, duket se i dërguari i posaçëm i OKB-së për Sirinë, Staffan de Mistura, ka gjetur një zgjidhje të ndërmjetme, duke ftuar përfaqësuesit e grupit kurd të Asamblesë Demokratike Siriane (SDA). /tesheshi.com/
