Kryeministri Ramush Haradinaj sot merr rrugë për në Hagë, për herë të tretë. Ish-komandanti i UÇK-së për Zonën e Dukagjinit pritet të intervistohet nga prokurorët e Gjykatës Speciale në Hagë më 24 korrik në cilësinë e të dyshuarit, dhe jo të akuzuarit, si herët e tjera.
Ftesa nga Gjykata Speciale ishte arsyeja që Haradinaj dha dorëheqje nga posti i kryeministrit, duke trazuar skenën politike dhe duke ngritur zërat për zgjedhje të parakohshme.
Por Haradinaj nuk u nis i vetëm. Edhe ish-kryetari i Kuvendit të Kosovës, Jakup Krasniqi është nisur drejt Hagës ku do të merret në pyetje nga Dhomat e Specializuara të Gjykatës Speciale.
Krasniqi, i cili gjithashtu qe një nga figurat më kryesore të UCK-së, është pjesë e Këshillit Kombëtar të Nismës Socialdemokrate. Nga kjo parti për në Hagë e kanë përcjellë edhe deputeti Bilall Sherifi dhe ministri Skënder Reçica. Për dallim nga Haradinaj, Jakup Krasniqi nuk e ka bërë me dije arsyen e ftesës atje. /tesheshi.com/
