Nga Blendi Gashi
Shërbimi Informativ i Kosovës (SHIK) i udhëhequr vite më parë nga tashmë kryekuvendari Kadri Veseli nuk ka pothuajse seancë plenare që nuk “zbret” në Kuvend, dhe përplas këtë të fundit me opozitarët, konkreitsht vetëvendosësit dhe LDK-istët që dyshojnë për punën që ka kryer ky shërbim, për çka jo rrallë herë kanë drejtuar edhe gishtin për vrasjet e pasluftës.
Dhe pas gjashtë vitesh kur dështoi hetimi i SHIK-ut i inicuar nga atë kohë AAK-ja e Ramush Haradinajt përmes deputetit të saj Burim Ramadani, deputetja e Vetëvendosje-s Albulena Haxhiu i ka bërë thirrje partisë së Isa Mustafës t’i japë nënshrimet dhe të nis siç thotë ajo hetimi i SHIK-ut.
“Meqë prokuroria asnjëherë nuk ka nisur hetimet për SHIK’un dhe as që e ka ndërmend të bëj diçka në këtë drejtim, atëherë sigurisht që një hetim të tillë duhet ta nisë Kuvendi dhe pikërisht kjo është arsyeja se pse ne që tri legjislatura, prej se jemi pjesë e institucioneve, kemi kërkuar hetimin e kësaj organizate kriminale dhe ilegale. Në mandatin tonë të parë, patëm arritur t’i mbledhim 27 nënshkrime, në të dytin 38, për shkak se LDK në mandatin e kaluar ishin në bashkëqeverisje me PDK-në, si grup parlamentar nuk na jepnin nënshkrimet edhe për shkak se kishin votuar Kadri Veselin për kryetar Kuvendi. Andaj i bëj thirrje Lumirit, Dritonit dhe gjithë deputeteve tjere te LDK’së, te na japin nenshkrimet. Nismen per hetimin parlamentar e kemi gati, na duhen edhe 8 nenshkrime, perveç 32 sa i ka grupi yne parlamentar!”,thuhet në ftesën e Haxhiut.
Ja përgjigja e LDK-së…
Megjithatë LDK-ja edhe pse jo rrallë herë ka akuzuar SHIK-un e Veselit për vrasjen e zyrtarëve të saj pasluftës siç duket për momentin nuk është e gatshme të japë nënshkrimet.
Deputetja e LDK-së, Besa Gaxheri, thotë se çështja e hetimit të SHIK-ut është serioze dhe nuk duhet të bëhet lojë politike me këtë gjë.
Ajo thotë se partia e saj është pro formimin të një komisioni hetimor por nuk tregon nëse ajo personalisht do ta japë nënshkrimin.
“Ne si LDK e kemi shqyrtuar disa herë, do ta analizojmë me gjakftohësi por s’do të lejojmë që me këtë çështje të përfitohen poena politik. Kjo temë është tepër e ndjeshme kërkon ekpertizë. Dëmi i është bërë LDK-së, në drejtësi duhen dëshmi. Jemi për me pas komision hetimor për një sektor të kësaj çështjeje, por jo të të bëjmë politik dhe t’i vëjmë kësaj pike se gjoja u mbyll. Kështu nuk shkon. Për këtë çështje duhet vërtet drejtesia ta thotë fjalën e saj”, thotë Gaxherri për tesheshi.com.
Deputeti i LDK-së, Driton Selmanaj njëri prej të cilëve është drejtuar thirrja ka deklaruar, se i duhet kohë për ta analizuar ftesën që iu është bërë nga Haxhiu, që të nisen hetimet ndaj organizatës së SHIK-ut.
“Një herë duhet analizuar, se çfarë kërkesa ka aty, se çka përfshin, çfarë periudhe dhe më pas do përgjigjem”, ka thënë shkurtimisht Selmanaj për Gazeta “Blic”.
Ja si krijohen komisionet parlamentare…
Është Neni 71 i Rregullores së Punës së Kuvendit i cili përcakton qartë se si mund të krijohet një komision hetues parlamentar dhe komisionet tjera.
- Kuvendi mund ta formojë një komision ad hoc, që e ka autoritetin e komisionit funksional.
Komisioni ad hoc është komision i përkohshëm, i cili merret me shqyrtimin e një çështjeje të veçantë. Nëse Kuvendi e formon një komision ad hoc, në vendimin e formimit duhet të përfshihet përbërja e komisionit, që duhet të jetë në përputhje me nenin 63 të kësaj
Rregulloreje.
- Kur Kuvendi e identifikon një çështje të rëndësisë së veçantë, e autorizon komisionin ad hoc për ta ftuar secilin zyrtar të Kosovës, që e sheh të arsyeshme, për të dëshmuar para komisionit. Kuvendi përcakton: procedurën, kohëzgjatjen e funksionimit të këtij komisioni, si dhe shpenzimet e mundshme të punës së tij.
- Hetimet parlamentare rregullohen me akte të veçanta të procedurës, që miratohen nga Kuvendi me shumicën e dy të tretave (2/3) të votave të deputetëve të pranishëm.
- Kur Kuvendi e sheh të arsyeshme, mund të formojë edhe komisione të tjera ad hoc për kryerjen e punëve brenda autorizimeve të tij
