Nga Blendi Gashi
Për shtatë vite me radhë, Hashim Thaçi, një herë si kryeministër e tani si presindet, është njeriu që e nisi dhe po tenton t’i japë vulën e fundit dialogut me Serbinë.
Për të bërë një gjë të tillë si kurrë më parë po i nevojitet edhe ndihma e opozitës, për çka u ka bërë thirrje që të përfshihen në dialog, duke thënë se “është koha që të gjithë të bëhemi bashkë që t’i përgjigjemi planit të Serbisë për aneksimin e veriut të vendit”.
Por është pikërisht Thaçi që gjatë gjithë kohës injoroi opozitën (përjashto Blerim Shalën që një kohë si nënkryetar i AAK-së mori pjesë në bisedime) dhe nuk kishte gatishmërinë ta thërrasë më herët që ta ndihmojë dhe, me gjuhë të ashpër i kundërpërgjigjej atyre kur deklaronin se bisedimet në mënyrën si po rrjedhin do i sjellin veç dëm vendit.
Thaçi, por edhe Mustafa, së fundmi publikisht haptazi i bën thirrje opozitës për bashkim kundër Serbisë. Por, kjo ftesë e tyre po shihet jo e sinqertë nga opozita, dhe me qëllim që edhe ato të futen në zjarr dhe më pas t’iu mveshet një pjesë e fajit për dështimin e dialogut.
Ismajl Kurteshi, deputet nga Vetëvendosje thotë se vendi duhet të shkoj në zgjedhje të prakohshme sepse kjo qeveri e ka humbur ligjitimitetin për të vazhduar bisedimet me Serbinë.
“Vetëm pas zgjedhje do duhej bisedimet së pari të riformatohen, të merremi vesh se për çka duhet biseduar dhe me çfare kushte”, thote Kurteshi, për tesheshi. com
I pyetur për zërat që janë rritur së fundmi që thonë se Albin Kurti duhet t’i udhëheq bisedimet, Kurteshi thotë se një gjë e tillë mund të ndodh vetëm nëse Serbia na njeh si shtet.
“Albin Kurti mund t’i udhëheq bisedimet, por jo këto aktualet, por një kapitull të ri bisedimesh. Serbia duhet ta njeh Kosovën si shtet dhe të pranoj bisedimet mbi parimin e reciprocitetit, dhe vetëm në këtë mënyrë bisedimet do të zgjedhin problemet mes dy shteteve fqinje”, thotë Kurteshi, për tesheshi. com.
Kurse Smaj Latifi nga AAK thotë se dialogu ka degraduar aq shumë saqë po shkon në dëm të Kosovës.
Ai thotë se Aleanca në vazhdimësi ka shprehur kundërshtimin për dialogun në të cilin Serbia imponon agjendat e veta dhe nëpërmjet tyre po i forcohet legalisht pozita e saj në Kosovë, andaj kërkon ndërprerjen e menjëhershme të tij.
Laftifi më tej shprehet se partia e tij do angazhohet që sa më shpejtë të ndodh dialogu ku në fokus ka vetëm një çështje: njohjen e Kosovës nga Serbia si kusht për normalizimin e raporteve mes dy vendeve.
Nga kjo sipas tij do të përfitojë edhe BE-ja si ndërmjetësues i dialogut, si dhe do të vendoset paqja dhe stabiliteti i qëndrueshëm në rajon.
“Prandaj, ftesave eventuale nga Isa Mustafa dhe Hashim Thaçi për t’ju bashkuar vazhdimit të dialogut pa kurrfarë dobie dhe interesi për Kosovën e në dëmin tonë, AAK-ja ua kthen mbrapshtë.
AAK-ja nuk mendon se duhet të bëhemi bashkë opozitë e pozitë që t’i kontribuojnë këtyre bisedimeve që po ia komplikojnë jetën shtetit për shkak të mundësive që po i krijohen Serbisë në këtë proces. Përkundrazi kërkojmë nga opozita që ta ndërprej këtë lloj dialogu pa kurrfarë kushtesh ndaj Serbisë”, thotë, Latifi, për tesheshi. com.
Ndërsa Nisma për Kosovën e Fatmir Limaj kërkon që strategjia kombëtare për bisedime me Serbinë të bëhet pas formimit të qeverisë së re.
Deputeti Enver Hoti thotë se subjeti i tij në as një mënyrë nuk merrë pjesë bisedimet të cilat po zhvillohen me Serbinë, pasi ato janë nisur keq dhe kanë rezultuar me marrëveshje të dëmshme për vendin.
“Dialogu i deritanishëm është bërë vetëm për interes të Serbisë dhe vazhdimi i tij nuk mund të prodhojë efekte të tjera. Vendi të shkojë në zgjedhje dhe vetëm pas qeverisë së re me një përfaqësim tjetër politik i cili do të jetë i aftë dhe kredibil do të mund të flasim për strategjinë kombëtare të bisedimeve”, ka thënë deputeti Hoti, për tesheshi. com.
Pas tensionimit të situatës, të martën në Bruksel zhvilluan takimin e parë krerët e dy shteteve në nivel presidentës e kryeministrash ku u pajtuan për ulje tensionesh dhe që dialgu të vazhdojë. /tesheshi.com/
