Edhe pas skadimit të afatit për regjistrimin në zgjedhjet e 18 qershorit, kreu i Opozitës, Lulzim Basha ka kërkuar sërish qeveri teknike që do të garantonte zgjedhje të lira dhe të ndershme. Basha tha nga çadra e ngritur në bulevard, se është i gatshëm për dialog, por jo për pazare. Ai tha se Rama në dialog duhet të vijë si kryeministër, por duhet të dalë nga ky dialog i dorëhequr.
Basha i quajti lojëra fjalësh deklaratat e kryeministrit Rama. Ai tha se takimi ishte caktuar, por se ishte kryeministri që ishte tërhequr prej dialogut.
“Dialogun e dakordësuam 6 ditë më parë. U ra dakord që do flitej për qeverinë teknike dhe mandatin e qeverisë teknike, ndaj të nesërmen dhe deri sot ekipi negociues i opozitës ka qenë në gatishmëri të dialogut. Në një dialog të tillë duhet të vijë edhe si kryeministër, nëse ky dialog nëse është i vërtetë do të ketë produkt qeverinë teknike. Mund të vijë si kryeministër në dialog, këtu në çadër do vijë i dorëhequr. Nuk ka lojëra fjalësh, do të vijë në dialog si kryeministër, por do të dalë nga dialogu si kryeministër i dorëhequr”, tha Basha. /tesheshi.com/
