Nga Blendi Gashi
Serbia ftoi për herë të parë dy komisione nga Kosova, Komisionin për Politikë të Jashtme me kryetare Vjosa Osmanin e LDK-së dhe Komisionin për Integrime me kryetare Blerta Deliu (por që kjo e fundit në pamundësi pjesëmarrje për shkak të agjendës, autorizoi deputetin Ilir Deda). Ftesa u bë nga kryetari i Komitetit për Integrim Evropian të Kuvendit të Serbisë, Nenad Çanak.
Por vetëm një ditë pas, ky shtet që po flet pa rresht kinse për normalizim raportesh me Kosovën i ra pishman dhe anuloi ftesën. Shkuarjen e delegacionit kosovarë e bllokoi kryeparlamentarja e Serbisë pas kundërshtimeve të deputetëve serbë.
Deputeti Ilir Deda e ka konfirmuar shkurt anulimin e ftesës.
“Serbia e ka anuluar pjesëmarrjen tonë në takimin që na ftoi”, ka thënë shkurt për tesheshi.com.
Ndërsa deputetja Osmani që konfirmoi shkuarjen në Beograd thotë se përmes një shkrese siç e quan aspak jo diplomatike dhe zyrtare për anulimin e vizitës së saj.
Ajo thotë se me këtë veprim në ditën e Evropës, Serbia tregoi fytyrën e vërtetë anti-evropiane
“Shteti i Serbisë përmes këtij vendimi tregoi se sa shume influencohet nga shovinistet dhe kriminelët e luftës si Vojislav Shesheli. Ishin pikërisht provokimet e këtij të fundit të cilat sjellën destabilizim të raporteve edhe me shtetin e Kroacisë javët e fundit. Edhe pse ka hapur shumicën e kapitujve për anëtarësim në BE, Serbia tregon se mbetet një shtet me vlera anti-evropiane dhe se gjithë të arriturat e saj drejt rrugës integruese i ka fituar përmes temave të Kosovës dhe jo për shkak të meritave dhe përmbushjes se standardeve. Veprime të tilla të Serbisë nuk i kontribuojnë as paqes e as normalizimit të raporteve, e aq më pak rrugës evropiane të Ballkanit Perëndimor”, shkruan Osmani në Facebook.
Për ç’arsye i ra pishman Serbia…
Ky anulim i ftesës për deputetët kosovarë nuk është aq befasues kur kihet parasysh reagimin e ashpër që bëri lideri i radikalëve serbë, Vojisllav Sheshel, i cili kërkoi nga shumica parlamentare serbe t’ia ndalojë Vjosa Osmanit hyrjen në ndërtesën e Kuvendit.
“Çanak këtë takim e ka planifikua si konferencë ndërparlamentare ‘Përmes idesë së BE-së drejt paqes dhe zhvillimit’, dhe do të mbahet më 11 dhe 12 maj në Beograd. Ai mund të ftojë vetëm përfaqësues shtetesh me të cilat Serbia ka marrëdhënie diplomatike apo përfaqësues shtetesh të cilat Serbia i njeh”, deklaroi Shesheli, derisa ka shtuar se në këtë rast s’kemi të bëjmë me një të tillë.
Dhe presioni i Sheshit bëri punë, duke mos ja mundësuar deputetëve Osmani e Deda të udhëtojnë në Beograd.
Sigurisht se një nga arsyet pse u tërhoq ftesa mund të jetë reagimi agresiv që shprehu Shesheli më 18 prill pas vizitës së një delegacioni nga Kroacia në Kuvendin e Serbisë, me ç’rast përdhosi flamurin kroat (shkeli me këmbë dhe tentoi ta shqyej), hyri në sallën ku qëndronte delegacioni kroat dhe nisi t’i shajë ata.
“Tani atje ju kam shkelur flamurin e ushtasëve…”(dhe ka vazhduar me sharje).
Ky veprim i tillë ngjalli reagime jo veç në Beograd por edhe më gjerë.
Kryetarja e parlamentit të Serbisë, Maja Gojkoviç, nxori një deklaratë ku dënoi siç tha “përpjekjen brutale të deputetit Vojisllav Shesheli për të kërcënuar dinjitetin e Asamblesë Kombëtare të Serbisë dhe delegacionit nga parlamenti i Kroacisë”.
Andaj Serbia mund të jetë frikësuar se një gjë të tillë sërish Shesheli do ta përsërisë të njëjtën edhe me deputetët kosovarë, pra do t’i fyejë ata dhe kjo do të mund të ishte një minus tjetër për politikën serbe dhe sigurisht një plus për politikën kosovare që janë të gatshëm të udhëtojnë në Beograd dhe të diskutojnë për tema të ndryshme me homologët e tyre.
Poashtu arsye tjetër mund të jetë se shkelja e ligjvënësve kosovarë në Kuvendin e Serbisë edhe pse sigurisht do prezantoheshin pa simbole shtetërore, mund të merrej nga opozitarët serb dhe analistë si një lloj “njohje”. /tesheshi.com/
