Kina refuzoi të lejojë vizitën e sekretarit amerikan të shtetit Antony Blinken, me shpjegimin se Pekini zyrtar nuk është gati të organizojë sërish vizitën e Blinken pasi kreu i diplomacisë amerikane anuloi papritur vizitën e tij në Kinë në shkurt, shkruan Financial Times (FT).
Blinken tha në fillim të kësaj jave se vizita në Kinë do të bëhet “kur kushtet janë të përshtatshme” dhe shtoi se qëllimi nuk është as të frenohet Kina dhe as të përfshihet në një luftë të re të ftohtë, raporton Reuters.
Raporti i FT pretendon se zyrtarët kinezë janë të shqetësuar se administrata e Presidentit të SHBA Joe Biden mund të publikojë raportin e Byrosë Federale të Hetimit (FBI) për balonën e rrëzuar kineze, me prova fizike, dhe se gjetjet mund të publikohen gjatë vizitës së Blinken në Kinë.
FBI dhe Këshilli i Sigurisë Kombëtare nuk pranuan të thonë nëse rezultatet e hetimit do të bëhen publike.
Marrëdhëniet mes dy vendeve, në nivelin më të ulët historik
Ministri i Jashtëm kinez Qin Gang ngriti çështjen me amerikanët që merrnin pjesë në Forumin e Zhvillimit të Kinës në Pekin muajin e kaluar, konfirmuan tre persona të njohur me ngjarjen.
Qin e përshkroi hetimin e FBI-së si një problem tjetër që e bën të vështirë stabilizimin e marrëdhënieve SHBA-Kinë.
Çështja ka shkaktuar përçarje brenda administratës Biden, me disa zyrtarë që kërkuan që provat të deklasifikohen dhe të bëhen publike, për të provuar se balona po kryente zbulim, sipas FT.
Kongresi amerikan ka të ngjarë të kërkojë që rezultatet e hetimit të FBI të bëhen publike.
Megjithatë, një tjetër rrymë në administratën amerikane argumenton se publikimi i informacionit do të prishte përpjekjet për të rifilluar angazhimin e nivelit të lartë shumë të nevojshëm midis Uashingtonit dhe Pekinit, në një kohë kur marrëdhëniet e dy vendeve janë në nivelin më të ulët që nga krijimi i marrëdhëniet diplomatike në vitin 1979. /tesheshi.com/
