Forca e Sigurisë të Kosovës është e gatshme për mision të ri dhe përgjegjësi të reja, tha sot ministri i Ministrisë për këtë forcë, Haki Demolli në konferencën për shtyp të fundvitit.
“Si objektiv i parë, është ngritja dhe ndërtimi i Ministrisë së Mbrojtjes dhe Forcave të Armatosura të Kosovës, në bazë të rekomandimeve të dala nga Rishikimi i Strategjisë të Sektorit të Sigurisë të Kosovës”, theksoi ai.
Objektivi i dytë, vijoi Demolli, është hartimi dhe aprovimi i Pakos ligjore dhe dokumenteve strategjike të Mbrojtjes.
“Objektivi i tretë, është intensifikimi dhe sforcimi i bashkëpunimit bilateral me Forcat e Armatosura të SHBA-ve, vendeve të tjera të rajonit, NATO-n dhe BE-në”, theksoi ministri.
Objektivi i katërt, tha ai, është pjesëmarrja aktive dhe kontributi substancial në ndërtimin e stabilitetit dhe bashkëpunimit rajonal.
“Objektivi i pestë është pjesëmarrja aktive dhe kontributi substancial në vendosjen e raporteve formale të bashkëpunimit të Republikës së Kosovës me NATO-n dhe BE-në”, tha ministri i FSK-së.
Ministri Demolli një rëndësie të veçantë i kushtoi bashkëpunimin me KFOR-in, të cilin e falënderoi për kontributin e dhënë në sigurisë e vendit.
Ai foli edhe për bashkëpunimin bilateral me NATO-n, KFOR-in, SHBA-të, si dhe shtetet tjera, sidomos theksoi bashkëpunimin e shkëlqyeshëm me Gradën Kombëtare të Ajovës (SHBA). /tesheshi.com/
