Presidentja e Kosovës Atifete Jahjaga, ka vlerësuar lartë FSK-në duke e inkurajuar për punë edhe më të madhe në të ardhmen ku kjo forcë po shkon në krijimin e një ushtrie dhe ka aspirata për t’u anëtarësuar në NATO. Këto komente presidentja i ka bërë gjatë ceremonisë së dorëzim – pranimit të detyrës së komandantit të FSK-së midis gjeneralëve Kadri Kastrati e Rrahman Rama.
Kjo ceremoni u mbajt në kazermën “Adem Jashari”, dhe përveç presidentes kanë marrë pjesë edhe kryeministri i Kosovës Isa Mustafa, ministri i FSK-së, Haki Demolli, komandanti i deritashëm FSK-së, gjenerallejtënant Kadri Kastrati, gjeneralmajor Rrahman Rama, komandanti i KFOR-it, gjeneralmajori Francesco Paolo Figliuolo, ambasadorë dhe atashe ushtarakë të akredituar në Kosovë, përfaqësues të NATO-s, oficerë të lartë të FSK-së, të KFOR-it, si dhe personalitete politike dhe ushtarake të vendit dhe të huaj.
Presidentja Jahjaga tha se ndërtimi i çdo institucioni në Kosovën e pasluftës ka qenë sfidues, po aq sa ishte edhe rrugëtimi i qytetarëve tanë për të realizuar ëndrrën e gjeneratave të tëra për të ndërtuar një Kosovë që frymon lirshëm, sovrane dhe të pavarur.
“Këtyre sfidave që na dolën përpara: si institucione dhe shoqëri, ju përgjigjëm me optimizëm. Bashkë me partnerët tanë ndërkombëtarë, i krijuam kushtet ta shpallim Kosovën shtet të pavarur, të njohur e të pranuar sot në botë, me aspiratën e qartë për t’u bërë anëtare e OKB-së, NATO-s dhe BE-së. E ngritëm kredibilitetin e shtetit tonë si një faktor konstruktiv në forumet rajonale e ndërkombëtare. Morëm vendime të rëndësishme, shtrimë dorën e bashkëpunimit edhe atëherë kur nuk ishte aspak e lehtë. Dhe këtë e bëmë me një qëllim – që Kosovën e lirë, sovrane dhe të pavarur, ta bëjmë të qëndrueshme, të palëkundur dhe të konsoliduar plotësisht”, tha Jahjaga.
Jahjaga tha se Forca e Sigurisë së Kosovës ka qenë shtyllë e këtij rrugëtimi tonë – gjithëpërfshirëse, patriotike, profesionale dhe shumë e besueshme dhe se nuk është e rastësishme që sot po e ndërtojmë vizionin, i cili do të shtojë obligimet tuaja, sepse si qytetarë të Kosovës, pavarësisht nga prejardhja etnike, ne besojmë në ju dhe në misionin fisnik që ju e keni ndërmarrë për ta mbrojtur Kosovën, për t’i ruajtur vlerat e idealet mbi të cilat u betuam dhe për të avancuar bashkëpunimin me aleatët tanë strategjikë.
“Ju e keni kaluar edhe një hap: Keni përmbyllur me sukses një periudhë të rëndësishme të Forcës së Sigurisë, duke hapur një kapitull të ri për ju dhe për gjithë vendin: krijimin e një Force moderne të armatosur, me kapacitete mbrojtëse, që adreson sfidat e sigurisë, e kompleton infrastrukturën tonë të sigurisë dhe në proces e sipër të profesionalizimit me standarde të NATO-s dhe që synon anëtarësimin në këtë aleancë”, theksoi Jahjaga.
Kryeministri i Kosovës Isa Mustafa ka thënë se Qeveria e Kosovës do të përmbush të gjitha detyrat që lidhen me procesin e transformimit të Forcës së Sigurisë së Kosovës në Forcë të Armatosur të Kosovës, në mënyrë që ato të jenë në nivel të standardeve të NATO-s, dhe që ky proces të zhvillohet në koordinim të ngushtë me partnerët tanë strategjik, dhe në transparencë maksimale me NATO-n.
“Republika e Kosovës dëshiron të institucionalizoj marrëdhëniet politike me NATO-n, përmes FSK-së, përkatësisht Forcave të Armatosura të Kosovës, dhe të merr përgjegjësinë e saj në misionet humanitare dhe paqeruajtëse. Ne kemi besim të plotë se Gjeneral Major Rrahman Rama, në bashkëpunim dhe bashkërenditje të plotë me Ministrinë e Forcës së Sigurisë, do të vazhdoj me sukses rrugën e zhvillimit dhe rrugën e transformimit të FSK-së në Forca të Armatosura të Kosovës”, tha Mustafa.
Mustafa falënderoi të gjitha vendet dhe të gjitha organizatat, të cilat kanë ndihmuar në transformimin dhe zhvillimin e FSK-së, sidomos Shtetet e Bashkuara të Amerikës dhe NATO-n. /tesheshi.com/
