Pjesëtarët e Forcës së Sigurisë së Kosovës (FSK), gjegjësisht ata të Kompanisë së Deminimit të Regjimentit të Mbrojtjes Civile, në bashkëpunim me pjesëtarë të Kompanisë së deminimit të KFOR-it amerikan dhe atij zviceran, sot në poligonin e gjuajtjes së KFOR-it në Rahovec, bënë demolimin e mbi 50 mjeteve të pashpërthyera të kalibrave të ndryshme.
Këto mjete të pashpërthyera janë gjetur gjatë operacioneve të vazhdueshme të Kompanisë së Deminimit në pastrimin e hapësirave të territorit të Kosovës gjatë vitit 2015 – 2016 .
Zëvendës Komandanti i Kompanisë së Deminimit, Kapiten Gëzim Sada, u shpreh mjaft i kënaqur me punën që bëjnë pjesëtarët e Kompanisë së Deminimit dhe me sukseset që vazhdojnë të kenë në këtë drejtim.
“Pjesëtarët e Kompanisë së Deminimit deri me tani ka pastruar një pjesë të madhe të territorit të Kosovës, ku kemi hasë në një numër të madh të mjeteve të pa shpërthyera , të cilat kanë ekzistuar nga Lufta e fundit në Kosovë dhe disa prej tyre ekzistojnë qysh prej Luftës së Dytë Botërorë, ku kemi rreth 20 demolime si ky sot, ku shkatërruam mbi 50 mjetë të ndryshme të pa shpërthyera”, ka thënë Sada.
Rreshteri Wayne Brown tha se ndjehet mjaft i kënaqur me bashkëpunimin që kanë me FSK-në.
“Kam marrë pjesë në rreth 20 demolime të bëra në Kosovë në bashkëpunim me pjesëtarët e FSK-së dhe jam i bindur se të dy palët kemi mësuar prej eksperiencave të njëri-tjetrit, pasi që pjesëtarët e FSK-së janë mjaft të sigurt në punën që ata e bëjnë në demolimin e mjeteve të pashpërthyera, dhe njëherësh këta pjesëtarë janë të aftë që të ballafaqohen me situatën në territorin e Kosovës”, ka thënë Brown.
Kapiteni Stefan Buhler nga Kompania e Deminimit i KFOR-it zviceran, i cili është në Kosovë qysh nga tetori i 2015 tha se përvoja me pjesëtarët e FSK-së nuk është vetëm një bashkëpunim në demolimin e mjeteve të pashpërthyera, por njëherësh është edhe lloj i ushtrimeve të përbashkëta me FSK-në dhe amerikanët.
Pjesëtarët e Kompanisë së Deminimit të Forcës së Sigurisë së Kosovës qysh prej vitit 2010- 2015 u janë përgjigjur 1800 detyrave, ku kanë bërë pastrimin e 1,425,401 metër dhe gjithsej kanë hasur në 5205 mjete të pashpërthyera. /tesheshi.com/
