Federata Shqiptare e Futbollit ka zgjedhur një mënyrë origjinale për t`i dalë para çdo të keqeje gjatë ndeshjes Shqipëri – Serbi, e cila pritet me ankth, e që do zhvillohet pas pak javësh në “Elbasan Arena”.
Tek pjesa e pasme e biletës, është shkruar gjerë e gjatë, (sa mbajnë përmasat), një mesazh për tifozët që mos ndërmarrin veprime të cilat mund të cënojnë imazhin tonë si shqiptarë, por dhe normalitetin e ndeshjes.
E mbingarkuar me tension nacional, ekziston frika se përballja shqiptaro-serbe në futboll mund të prodhojë skena të padëshiruara. Jo vetëm pse përballë kuqezinjve janë serbët, armiq të përbetuar mbi 1-shekullor të shqiptarëve, që po ashtu vijojnë të shfaqin armiqësi; por dhe sepse takimi i një viti më parë në Beograd, i ndezi gjakrat nacionalistë për shkak të një droni të lëshuar mbi stadium, ç`ka solli një përplasje fizike në fushë mes lojtarëve, me pasojë ndërprerjen e ndeshjes.
“Një sjellje jo e mirë kundrejt e tifozëve kundër skuadrës kundërshtare do të shuante ëndrrën e shkuarjes në ‘Euro 2016’, është një ndër frazat e apelit të lëshuar në të pasmen e biletës nga ana e FSHF-së, duke dashur që kjo porosi të këtë efekt maksimal tek shpirtëra të trazuar tifozësh, që besohet se u intereson më tepër shkuarja në ‘Francë 2016’ se sa rrahja e serbëve me gola.
Madje, deri më tani nuk ekziston asnjë sondazh që të përcaktojë se sa ndahen shqiptarët në synimet e tyre: nëse më shumë janë për ‘Francën’, pavarsisht rezultatit me serbët, apo e kundërta, nuk u intereson shumë ‘Franca’, mjaft që t`u japet dajak serbëve, gjithnjë me gola është fjala.
Për takimin Shqipëri – Serbi, flitet se do jenë të angazhuar shumë efektivë të shërbimeve sekrete, si dhe padyshim forca policore.
Ndërkohë, ditë më parë u dha një sinjal që serbët nuk po rrijnë duarkryq, por po përpiqen të gjëjnë një mënyrë për të na sfiduar, ngjashëm siç u ndjenë të sfiduar nga droni mbi kokat e tyre.
Një shtetas serb u ndalua në doganën e Qafë – Thanës me dy dronë, por që nuk u dha asnjë info e mëtejshme nëse ishin të destinuara për takimin e shumë pritur.
Mes rreshtave të mesazhit të FSHF-së drejtuar tifozerisë shqiptare, mund të lexohet dhe kjo porosi e troçtë: Përmbahuni! Më mirë një pulë në mot sesa një vezë zot!
Në këtë rast, “pula” është shkuarja në eliminatore ‘Francë 2016’, ndërsa “veza” në mos fitore, do ishte një tentativë nervoze për t`i sfiduar serbët me të tjera forma në vend të golave, çka mund të riskonte nëse do kishte incidente.
Kjo dhe për shkak të dhënies se trepikësisht Shqipërisë për ndeshjen në Beograd. Zhvillime jo të hijshme në rradhët e tifozerisë, mundet të penalizonin rëndë Shqipërinë edhe në imazh, por që do e gëzonin pa masë dhe trajnerin danez, Morten Olsen, armik i shpallur i vendimit të CAS-it, për t`ia dhënë fitoren në tavolinë Shqipërisë pas asaj që ndodhi në ndeshjen e Beogradit. /tesheshi.com/
