Sekretari i Përgjithshëm i FSHF-së, Ilir Shulku, është shprehur për masa të ashpra ndaj rasteve të fundit të dhunës në fushat e gjelbra të Shqipërisë.
Ai i është referuar dy syresh, ndeshjes Luftëtari – Pogradeci dhe Korabi – Kastrioti kur ka deklaruar se: “Realisht është për të ardhur keq, pasi javët e fundit kanë ndodhur disa incidente, në disa fusha të Superiores, të Kategorisë së Parë dhe Kategorisë së Dytë. Nuk mund të jap opinion, sepse nuk është në tagrin tim, por janë komisionet që marrin vendimet. Ne mund t’u kërkojmë atyre të jenë shumë të ashpra në vendimet e tyre”, tha Shulku gjatë një interviste për Top Channel.
Por nuk dihet nëse qënia e Shulkut dibran do influencojë në vendimin mbi Korabin që në këtë rast është shumë delikat, për vetë rastin specifik që paraqet.
Korabi nuk humbi, por fitoi me Kastriotin, duke kaluar njëherësh në Superiore, kështu që logjikisht nuk kishte pse tifozët apo lojtarët e saj të ushtronin dhunë.
Sipas drejtuesve të klubit dibran, ishin miqtë ata që provokuan të parët, pasi një tifoz krutan u fut në fushë pas përfundimit të lojës dhe gjatë gëzimit të lojtarëve vendas, duke u bërë provokator i situatës me ushtrim dhune ndaj tyre. /tesheshi.com/
