Emigrantët që jetojnë në Britani “pa letra” përballen me dëbim të menjëhershëm nga shtëpitë që kanë marrë me qira, sipas ligjeve të reja të dizenjuara për ta bërë Britaninë një vend më të vështirë për emigrantët.
Në një ilustrim dramatik të paralajmërimeve drejtuar emigrantëve nga kryeministri Cameron dhe ministrja e Brendshme, Theresa May, Qeveria do të ndryshojë ligjin duke lejuar pronarët e shtëpive të dëbojnë emigrantët pa vendim gjykate.
Pronarët e shtëpive që nuk kontrollojnë statusin e emigrantëve të cilëve u japin shtëpi me qira do të gjobiten, ose futen në burg për pesë vjet pasi në ligjet e reja kjo do të përbëjë një krim penal.
Pronarët e shtëpive janë në qendër të operacioneve policore, madje do të krijohet një listë e zezë e atyre që janë konstatuar se kanë dhënë shtëpi me qira për emigrantët e paligjshëm.
Cameron ka premtuar “të mos lejë gurë pa kthyer” në përgjigje të krizës së emigrantëve në Calais e që ai e përshkroi si “mizëria e njerëzve” që synojnë Britaninë. Një gardh i ri mbrojtës në anën franceze të tunelit do të përfundojë brenda javës.
Qeveria britanike ka marrë kritika të forta kur konfirmoi se planifikon t’ua heqë familjeve në mënyrë automatike të drejtën e përfitimeve në momentin që atyre u refuzohet aplikimi për azil.
Qeveria thotë se këto masa janë paralajmërim se Britania nuk është vendi “i qumështit dhe mjaltit”. Bëhet fjalë për një nismë qeveritare për të shkurajuar ata që synojnë të hyjnë në Britani, duke u treguar atyre se vendi nuk është mikpritës.
Përpjekjet britanike shkojnë në bashkëpunim me autoritetet franceze, e në një artikull të përbashkët në Sunday Telegraph, ministrat e dy vendeve thanë se bota po përballet me një krizë migrimi dhe u zotuan të ofrojnë azil për ata që largohen nga lufta apo persekutimi. Por, sipas dy vendeve, është e rëndësishme të zhbëhet lidhja mes kapërcimit të Mesdheut dhe vendosjes në Europë.
Në këtë drejtim, shkojnë edhe ligjet e reja britanike, me anë të të cilave bëhet më e lehtë dëbimi i emigrantëve nga shtëpitë me qira. Pronarët e shtëpive sapo marrin njoftimin nga Zyra e Brendshme se qiramarrësit nuk kanë më të drejtën të qëndrojnë në Britani, mund t’i dëbojnë ata, edhe pa vendim gjykate.
Qeveria britanike pritet të zbatojë edhe një test më skrupuloz për pronarët e shtëpive që përfitojnë nga emigrantët, duke i strehuar ato në vend të papastra, pa kushte higjenike dhe duke futur me dhjetëra persona në dhoma të vogla. /tesheshi.com/
