Deputeti i LSI-së, Shkëlqim Selami, është paraqitur në Prokurorinë e Përgjithshme pasi emri i tij u përfol në media dhe u akuzua nga Partia Demokratike, se kishte fshehur një dënim të mëparshëm në Itali.
Selami mësohet se është thirrur nga sektori i dekriminalizimit në Prokurori, ku është pyetur një orë nga prokurorët. Pas daljes nga Prokuroria deputeti nuk ka dhënë asnjë deklaratë për mediat, ndërsa më herët kishte hedhur poshtë akuzat ndaj tij.
Akuza fillimisht erdhi nga syri.net, një media e afërt me opozitën, e cila shkruante se Selami ka fshehur një dënim të marrë në Itali në mesin e viteve ’90.
Sipas dokumenteve që posedonte kjo media, Shkëlqim Selami është i dënuar në Brindizi. për “trafik të qenieve njerëzore” si dhe për futjen në Itali të qytetarëve ekstrakomunitarë.
Më pas, përmes një prononcimi nga selia e PD-së drejtori i Departamentit të rendit dhe sigurisë në PD, Enkelejd Alibeaj, tha se Rama vazhdon kontratën e tij me krimin në të gjitha format, dhe nuk ka ndërmend të ndahet prej tij.
“Jo vetëm nuk shkarkon Rroshin, të cilit ia quajti publikisht të mbyllur shërbimin kur i doli dënimi në Itali për përdhunim, por jep letra rekomandimi për kreun e bandës në Durrës, Lulzim Berisha, dhe del se po pasuron radhët me anëtarë të rij të klubit të krimit, me deputetë si Selami”.
Partia Demokratike i bëri thirrje institucioneve që ligji i dekriminalizimit i ngarkon me këtë detyrë, “KQZ dhe Prokuroria, të veprojnë me shpejtësi, të mos i zvarrisin rastet si deputeti Selami, e të tjerë deputetë dhe kryetarë bashkie të kësaj mazhorance.
Vetë deputeti Shkëlqim Selami iu përgjigj akuzave me humor: “Në Tiranë ka plas peshku i mediave sociale! Më kanë futur këto ditë në grupin e tyre të ndryshkur dhe me nxjerrin lart e poshtë emrin si kriminel. Shyqyr që jam nga Vlora dhe futbollin e kam lozur me porta të mëdha, se do isha mërzitur vërtet!”, shkruan ai në facebook.
Mbetet të pritet versioni i Prokurorisë dhe i KQZ-së për vërtetësinë e dokumenteve të publikuara, nëse do të ndikojnë në heqjen e mandatit të Selamit si deputet. /tesheshi.com/
