Pas investimit për Shqipërinë në BE, patur si kredo politike dhe në fushatë, kryeministri Rama u kujtua për përditshmërinë e bujkut shqiptar, tokës, fshatit, asaj që po ulërin mes shumë ulërimave të realitetit shqiptar.
Nga Cërriku, në një takim me fermerë të zonës, kreu i qeverisë kërkoi diskutim të hapur mbi problemet që përjetojnë çdo ditë fermerët.
“Vetëm kështu mund të kuptojmë realisht se çfarë nuk funksionon dhe çfarë duhet të bëjmë më mirë.”, tha kryeministri i cili më tej pranoi se mbështetja për bujqësinë ekziston, por në praktikë përballet me probleme serioze dhe thelbësore që duhen adresuar me urgjencë.
Ai e pranoi se një pjesë e madhe e energjisë që fermerët shpenzojnë sot përballet me burokraci dhe mungesë funksionaliteti institucional.
“Nuk mund të jetë kjo një histori mbështetjeje minimale për të mbajtur frymën gjallë. Duhet të jetë një bashkëpunim i sinqertë për të transformuar jetën në fshat dhe për ta kthyer bujqësinë në një sektor fitimprurës dhe dinjitoz”, tha ai.
Me gjuhën e Erion Braçes, denoncuesit më të fuqishëm në radhët e mazhorancës të dështimeve në bujqësi e blektori, Rama ngjante si të ishte në opozitë e jo në qeverisje.
“Është një zinxhir që duhet kuptuar siç duhet që nga farat te subvencionet te mënyra se si bëhen aplikimet dhe shpërndahen subvencionet dhe me radhë tek asistenca që merret nga institucionet të territor si funksionojnë drejtoritë te linjat e prodhimit, te faturat e kështu me radhë.
Nëse nuk arrijmë dot t’i japim bujqësisë profilin e sipërmarrjes dhe nëse nuk arrijmë dot t’i japim të gjithë atyre që duan një shans që të jetojnë në fshat, që të dalin me një fitim që jua bën kuptimplotë jetën e tyre në fshat, ne nuk e kemi kryer detyrën dhe kjo nuk mund të jetë një histori subvencionesh për të mbajtur frymën, por një bashkëpunim për të transformuar frymën e punës dhe frymën e gjithë jetës së një sipërmarrje rurale”, tha kreu i qeverisë.
Por ngjan paradoks fakti që këtë gjë ai e thotë pas 12 viteve qeverisje, si të ishte në opozitë apo në vitin e parë të qeverisjes. /tesheshi.com/
