Për muaj të tërë, zyrtarët e qytetit të Nju Jorkut po luftojnë shpërthimin epidemik të fruthit në komunitetet hebreje në Brooklyn.
Ata u përpoqën të bënin fushatë në terren, duke punuar me rabinë dhe duke shpërndarë mijëra fletëpalosje për të inkurajuar prindërit që të vaksinojnë fëmijët e tyre, dhe provuan masa më të ashpra, si ndalimi i nxënësve të pavaksinuar nga shkuarja në shkollë.
Por me rastet e fruthit gjithnjë në rritje dhe një lëvizje kundër vaksinimit që është përhapur me të madhe, zyrtarët e shëndetësisë të qytetit morën një hap më drastik për të frenuar një nga shpërthimet më të këqija të fruthit ndër dekada.
Kryebashkiaku Bill de Blasio shpalli emergjencë shëndetësore publike që do t’u kërkonte individëve të pavaksinuar të Brooklyn që të marrin vaksina kundër fruthit. Kryetari i bashkisë tha se qyteti do të lëshonte gjoba prej 1,000 dollarësh për ata që nuk pajtoheshin me këtë vendim.
“Ky shpërthim i fruthit është shumë, shumë shqetësues dhe duhet të trajtohet menjëherë”, tha Bill de Blasio, duke shtuar se vaksina kundër fruthit vepron, është e sigurt, është efektive dhe është testuar me kohë. /tesheshi.com/
